धरमपुर, मंसिर १८ । सामुदायिक विद्यालयको पूर्वाधार विकास र शैक्षिक गुणस्तर सुधारका लागि यहाँका एकजना समाजसेवी लागिपरेका छन् ।
समुदायबाटै विद्यालयको हरेक क्षेत्र सुधार गर्न सकिन्छ भन्दै शिवसताक्षी नगरपालिका– २ का मचिन्द्र शेर्माले शिवसताक्षी नगरका सामुदायिक विद्यालयमा पुगेर विभिन्न किसिमका सहयोग गर्न थालेका हुन् । शेर्माले नगरका सामुदायिक विद्यालयलाई सहयोग गर्ने उद्देश्यले विभिन्न विद्यालयको अवलोकन भ्रमण गर्ने गरेका छन् । काठमाण्डौबाट गृहनगर शिवसताक्षी आएपछि कुनै न कुनै परोपकारी योजनामा उनी अग्रसर छन् ।
शेर्मा नेपाली कांग्रेसको महासमिति सदस्य हुन् । शेर्माको मुख्य पेशा बैदेशिक रोजगार हो । उनले आफ्नो व्यवसायबाट हुने आम्दानीले समाजसेवा गर्ने गरेको बताए । छोराछोरीको अध्ययन अध्यापन, घरपरिवारको खर्च गरेर बचेको रकमले समाजसेवा गर्ने गरेकोे उनी बताउँछन् । ‘समाजसेवाबाट आत्मसन्तुष्टि मिल्छ,’ उनले भने । चाडपर्वका बेला विपन्नका घरमा चामलको भारी आफै बोकेर जाने गरेका शेर्मा दैवी प्रकोपमा पनि राहत र उद्धारमा सहभागी हुने गरेका छन् ।
पछिल्लो समय सामुदायिक विद्यालयको शैक्षिक गुणस्तर तथा पूर्वाधार निर्माणका लागि उनी मरिहत्ते गरेर लागिपरेका छन् । शिक्षा र स्वास्थ्य क्षेत्रमा सुधार भयो भने मात्र समाजमा समृद्धि आउँछ भन्ने उनको ठम्याई छ । आइतबार मात्र वडा नम्बर ३ कमलधापको शान्ति आधारभूत विद्यालयमा पुगेर उनले नगद १० हजार प्रदान गरे । उनले विद्यालयका प्रधानाध्यापक विष्णुप्रसाद भट्टराईलाई भौतिक पूर्वाधारतर्फ पनि हात फुकाएर सहयोग गर्ने बचन दिए ।
यसै साता उनले वडा नम्बर ८ को अरुणोदय प्राथमिक विद्यालयमा २५ हजार नगद प्रदान गरेका थिए । शेर्माले सोही वडाको सरस्वती प्राथमिक विद्यालयका १ सय विपन्न अभिभावक विद्यार्थीलाई जाडोमा लगाउने स्वीटर प्रदान गरेर समाजका लागि अनुकरणीय कार्य गरेका थिए ।
