झापा , पुष २ । पार्टीको ‘समृद्धिका लागि संकल्प यात्रा’मा अवरोध गरेका पहिचानवादीविरुद्ध नेकपा एमाले अझ कडा रुपमा प्रस्तुत भएको छ ।
मध्यपहाडी लोकमार्गमा बैतडीको झुलाघाटदेखि पाँचथरको चिवाभञ्ज्याङसम्मको संकल्प यात्रा समापन भएको भोलिपल्ट एमालेका वरिष्ठ उपाध्यक्ष इश्वर पोखरेल पहिचानवादीप्रति खरो रुपमा प्रस्तुत भएका हुन् । उनले पहिचानवादीहरुको हिंसात्मक क्रियाकलाप कदापि स्वीकार गर्न नसकिने बताए । ‘संविधानसम्मत सबै कुरा राख्न पाइन्छ , विमति जनाउन पाईन्छ , विरोध गर्न पाइन्छ तर, त्योभन्दा फरक रहेर हिंसालाई प्रोत्साहन गर्ने क्रियाकलाप स्वीकार्य हुँदैन’ सोमवार प्रेस चौतारी झापाले बिर्तामोडमा आयोजना गरेको पत्रकार सम्मेलनमा उनले भने ।
पहिचानवादीहरुले गरेको हिंसाको प्रतिहिंसाले जवाफ नदिने भन्दै वरिष्ठ उपाध्यक्ष पोखरेलले आफूहरुले शान्तिपूर्ण रुपले जनतामाझ कुरा राख्ने बताए । उनले पहिचानवादीहरुलाई मारकाटमा उत्रिएर समाधान नखोज्न चेतावनी दिँदै मारकाटबाट समाधान किमार्थ संभव नहुने स्पष्ट पारे । उनले प्रक्रियाबाट टुंगिसकेको प्रदेशको नामकरणको सवालमा बितण्डा नमच्चाई चित्त नबुझे विधिसम्मत , शान्तिपूर्ण ढंगले समाधान खोज्न आग्रह गरे ।
यसअघि एमालेले पूर्व मुख्यमन्त्री हिक्मतकुमार कार्कीको सयोजकत्वमा वार्ता समिति गठन गरिसकेको स्मरण गराउँदै वार्ता संवाद नै अन्तिम विकल्प भएको जोड दिए । एमालेको संकल्प यात्रा कोशी प्रदेशमा प्रवेश गरेदेखि नै पहिचानवादीहरुले अवरोध गरेका थिए । शुरुदेखि नै बन्द हड्ताल गरेका पहिचानवादीहरुले धनकुटामा एमाले अध्यक्ष केपी ओलीमाथि दुर्व्यवहारसमेत गरेका थिए ।
