द्रोण अधिकारी
भद्रपुर । भद्रपुर नगरपालिकाले व्यावसायिक कृषिमा जीवन समर्पण गरेका अगुवा कृषक पहिचान गरी किसान परिचयपत्र वितरण सुरू गरेको छ ।
नगरपालिकाले व्यावसायिक कृषिको वातावरण सुरक्षित राख्न कृषिमा सामाजिक सुरक्षा कार्यक्रमअन्तर्गत किसान परिचयपत्र वितरण थालेको हो ।
संघीय सरकारबाट प्राप्त सशर्त अनुदानअन्तर्गत प्रतिवर्ष प्राप्त दुई लाख रकममा नगरपालिकाले १० लाख थप गरी वडा नम्वर १ र २ मा किसान परिचयपत्र वितरण गरेको छ भने वडा नम्वर ३ र ४ मा किसानहरूको पहिचान गर्ने काम गरिरहेको छ ।
नगर कृषि शाखाका निमित्त प्रमुख सुमन विमलीका अनुसार नगर कार्यपालिकाले तय गरेको मापदण्ड अनुसार भद्रपुर नगर क्षेत्रमा व्यावसायिक कृषि कर्म गरिरहेका किसानहरूको स्थलगत अनुगमनपश्चात् पहिचान गरेर किसान परिचयपत्र वितरण गरिने गरिएको छ ।
पछिल्लो चरणमा वडा नम्वर ३ र ४ का किसानहरूको विवरण लिएर परिचयपत्र प्रमाणिकरण प्रकृयाका लागि वेबसाइटमा नाम सार्वजनिक गरिएको छ ।
यसका लागि नेपाल सरकारको सशर्त अनुदानबाट आउने बार्षिक २ लाख रकम कम भएपछि बाँकी काम रहेका वडामा एकमुष्ठ किसान परिचयपत्र वितरण गर्न नगरपालिकाले १० लाख रकम विनियोजन गरेर काम अगाडि बढिरहेको निमित्त प्रमुख विमलीको भनाइ छ ।
यस्तै भद्रपुर नगरपालिकाले पशुपालन र कृषि कर्ममा कृषकलाई सहज वातावरण निर्माण गर्न नगरको दक्षिणी क्षेत्रमा पर्ने वडा नं १, २ र ३ लक्षित गरी कृषि र पशुको प्राविधिक सेवा बिस्तार गरेको छ । यस सेवा केन्द्र स्थापनासंगै सयांै पशुपालक कृषक लाभान्वित भएको नगर कृषि तथा पशुपंछी शाखाको दावी छ ।
यता कृषिको बाली लगाउँदा हुने जोखिमबाट लगानी सुनिश्चित गर्न कृषि बिमा कार्यक्रम लागु गरेको भद्रपुरमा त्यसको लाभ लिन कुनै पनि किसानले चासो नराखेको पाइएको छ ।
कृषि बिमा निःशुल्क गर्न नगरपालिकाले बजेट बिनियोजन गरेको भए पनि कृषकले लगाउने कुनै पनि बालीको कृषि बिमा गर्न माग गरेका छैनन् ।
त्यस्तै नगरपालिकाले नगरक्षेत्रमा कृषि प्रयोजनका लागि सञ्चालन गरिने कृषि सिंचाईको विद्युत महशुलको ५० प्रतिशत रकमं नगरपालिकाले तिरिदिने घोषणा गरेको छ ।
नगर प्रमुख गणेश पोखरेलका अनुसार कृषि उत्पादनको लागत घटाएर व्यावसायिक कृषिमा किसानको आकर्षण बढाएर अन्न उत्पादनमा नगरपालिकालाई आत्मनिर्भर गराउन अनुदान कार्यक्रम ल्याइएको हो ।
