झापा,बैशाख १२ । अमेरिकी सिनेटले टिकटकलाई अमेरिकामा प्रतिबन्ध लगाउन सक्ने विवादास्पद ऐतिहासिक विधेयकलाई अनुमोदन गरेको छ। यसले टिकटकको चिनियाँ मालिक बाइटडान्सलाई आफ्नो हिस्सेदारी बेच्न नौ महिनाको समय दिएको छ, अन्यथा यो एप संयुक्त राज्यमा प्रतिबन्धन गरिनेछ।
अब यो विधेयक अमेरिकी राष्ट्रपति जो बाइडेनलाई हस्तान्तरण गरिनेछ । उनले यो आफ्नो डेस्कमा पुग्ने बित्तिकै हस्ताक्षर गर्दै यसलाई कानुनका रूपमा लागू गर्ने बताएका छन्। यदि त्यसो भयो भने, बाइटडान्सले जबरजस्ती बिक्री पूरा गर्न चिनियाँ अधिकारीहरूबाट स्वीकृति लिनुपर्नेछ, जसको बेइजिङले विरोध गर्ने बताइएको छ। विश्लेषकहरूका अनुसार यो प्रक्रिया वर्षौँ लाग्न सक्छ।
यो विधेयकलाई युक्रेन, इजरायल, ताइवान र इन्डो–प्यासिफिकमा अन्य अमेरिकी साझेदारहरूको लागि सैन्य सहायता समावेश गर्ने चार विधेयकहरूको प्याकेजको भागको रूपमा पारित गरिएको थियो । यसको पक्षमा ७९ जना सांसद र १८ जनाले विपक्षमा मतदान गरेका थिए ।
‘वर्षौँदेखि हामीले चिनियाँ कम्युनिस्ट पार्टीलाई अमेरिकाको सबैभन्दा लोकप्रिय एपहरू मध्ये एकलाई नियन्त्रण गर्न अनुमति दियौँ, जुन खतरनाक रूपमा अदूरदर्शी थियो,’ गुप्तचर समितिका शीर्ष रिपब्लिकन सिनेटर मार्को रुबियोले भने, ‘“नयाँ कानुनले यसको चिनियाँ मालिकलाई एप बेच्न बाध्य पार्नेछ । यो अमेरिकाको लागि राम्रो कदम हो ।’
