झापा,साउन ९ । बङ्गलादेशमा आन्दोलन मत्थर भएसँगै त्यहाँस्थित नेपाली विद्यार्थी अब स्वदेश फर्किनुपर्ने अवस्था नरहेको परराष्ट्र मन्त्रालयले जनाएको छ । आरक्षणसम्बन्धी व्यवस्थाका विषयमा त्यहाँको सर्वोच्च अदालतले उच्च अदालतको निर्णय खारेज गरेसँगै आरक्षणविरोधी आन्दोलन तुहिएको हो । अवस्था जटिल हुँदाका बखत परराष्ट्रमन्त्री डा. आरजु राणाले त्यहाँ रहेका नेपालीको सुरक्षामा चासो दिँदै अति जोखिम क्षेत्रमा रहेकालाई स्वदेश फर्काउन पहल गरेकी थिइन् ।
आन्दोलन अन्त्य भएकाले अब नेपाली विद्यार्थीले असुरक्षित महसुस गर्नुपर्ने अवस्था नरहेको मन्त्रालयका प्रवक्ता अमृतबहादुर राईले बताए । फर्किन टिकट काटिसकेका र त्यो रद्द गर्न नमिल्ने अवस्थाबाहेकका विद्यार्थीलाई नफर्किन अनुरोध गरिएको राईले जानकारी दिए । तथापि फर्कनैपर्ने बाध्यता रहेको र अझै असुरक्षित महसुस गरिरहेका हकमा स्वनिर्णयले फर्किन पाउने उनले प्रस्ट पारे । मन्त्रालयका अनुसार मङ्गलबारसम्म एक हजार तीन सय नेपाली विद्यार्थी स्वदेश फर्किसकेका छन् ।
हवाईमार्ग र स्थलमार्ग गरेर सोमबार मात्र १२६ जना नेपाल भित्रिएका छन् । नेपाली विद्यार्थीसँगै आएका माल्दिभ्स, भुटानलगायत देशका विद्यार्थीलाई पनि सुरक्षाका लागि नेपाल आउन दिइएको छ ।
टिकट काटिसकेका हकमा फर्किन चाहनेलाई दूतावासले समन्वय गरिरहेको परराष्ट्र मन्त्रालयका सूचना अधिकारी ऋषिराज आचार्यले जानकारी दिए । बङ्गलादेशमा नेपालबाट चिकित्साशास्त्र अध्ययनका लागि विद्यार्थी जाने गरेका छन् । कतिपय सरकारी छात्रवृत्तिमा र कतिपय आफ्नै खर्चमा त्यहाँ अध्ययनका लागि जाने गरेका छन् । बङ्गलादेशमा तीन हजार जना नेपाली विद्यार्थी तथा केही व्यावसायिक र सरकारी कामकाजको सिलसिलामा नेपाली नागरिक रहेको जनाइएको छ ।
