झापा , भदौ ५ । घरमा अवैध रुपमा हातहतियार लुकाई छिपाइ राख्ने एक व्यक्ति झापाको अर्जुनधारामा पक्राउ परेका छन् ।
![](https://pratidindaily.com/wp-content/uploads/2024/08/download-14.jpg)
पक्राउ पर्नेमा अर्जुनधारा नगरपालिका वडा नं.४ दहिझोडा बस्ने बर्ष अन्दाजी ६२ का इन्द्रबहादुर आङ्देम्बे रहेका छन् । घरमा अवैध रुपमा हातहतियार लुकाई छिपाई राखेको भन्ने गोप्य सूचनाको आधारमा इलाका प्रहरी कार्यालय बिर्तामोडबाट खटिएको प्रहरी टोलीले गएराति ८ बजे उनको घरको खानतलासी लिएको थियो । त्यसक्रममा घरदेखि अन्दाजी ५ मिटर दक्षिणमा रहेको कुखुराको खोरको कासको छानोभित्र पहेलो प्लास्टिकमा पोका पारी लुकाई छिपाई राखेको अवस्थामा एक थान कटुवा पेस्तोल फेला परेको थियो । पेस्तोलसहित उनलाई नियन्त्रणमा लिई इलाका इलाका प्रहरी कार्यालय बिर्तामोडमा राखी थप अनुसन्धान भइरहेको जिल्ला प्रहरी कार्यालयका डीएसपी कृष्णकुमार चन्दले बताए ।
भारतसंग खुल्ला सिमाना भएको झापामा अवैध हातहतियारको अवस्था भयावह देखिएको छ ।
भारतीय क्षेत्रबाट अवैध तरिकाले भित्रिने हतियार चुनौती बनेको प्रहरीको भनाई छ । झापामा लगातार अवैध हतियार बरामद हुँदै आएको छ ।
यसअघि गत साताको शनिवार राति भरुवा बन्दुक र चोरीका सामानसहित अर्जुनधारामा ३ जना पक्राउ परेका थिए । पक्राउ पर्नेहरूमा अर्जुनधारा नगरपालिका–४ का १९ वर्षीय आदित्य लिम्बू, सोही ठाउँका २२ वर्षीय छिरिङ तामाङ र २१ वर्षीय निखिल तामाङ रहेका छन् ।
त्यसको पर्सिपल्ट सोमवार दमकमा पेस्तोल र म्याग्जिनसहित दमक नगरपालिका– ८ निवासी ३६ वर्षीय सञ्जीव गजमेर पक्राउ परेका थिए ।