झापा, भदौ १२ । आन्तरिक राजस्व कार्यालय दमक झापाका प्रमुख कर अधिकृत लवकुमार अधिकारीको सरुवा भएको छ ।
![](https://pratidindaily.com/wp-content/uploads/2024/08/243269104_167118635575866_3801154926024311822_n.jpg)
उनी आन्तरिक राजस्व कार्यालय इटहरीको प्रमुख कर अधिकृतको रुपमा जाने भएका हुन् । अधिकारीको ठाउँमा आन्तरिक राजस्व कार्यालय सिरहा लहानबाट पुन्यप्रसाद रिजाल आउने भएका छन् ।
अर्थ मन्त्रालयले भन्सार, कर र राजस्व कार्यालयका ५८ जना उपसचिवको सरुवा गरेको हो । मन्त्रालयको सचिवस्तरीय निर्णयअनुसार तातोपानी, जलेश्वर र कैलाली भन्सार कार्यालयका प्रमुखहरु फेरिएका छन् । काठमाडौं उपत्यकासहित मुलुकका आन्तरिक राजस्व कार्यालयका २३ जना प्रमुख फेरिएका छन् ।
त्रिभुवन विमानस्थल भन्सार कार्यालय र गौतमबुद्ध अन्तर्राष्ट्रिय विमानस्थलका गरी तीन जना प्रमुख भन्सार अधिकृतको सरुवा गरिएको छ । पछिल्लो समय चीनसँगको व्यापार सहजीकरण गरेर राजस्व संकलन उल्लेख्य वृद्धि गराएका तातोपानी भन्सार प्रमुख दयानन्द केसीलाई अर्थ मन्त्रालय सरुवा गरिएको छ । तातोपानीमा अर्थबाट उपसचिव कमलकुमार भट्टराईलाई पठाइएको छ । त्यस्तै, कैलाली भन्सारका राजेन्द्रकुमार हमाललाई भन्सार विभाग र जलेश्वर भन्सारका अमित पौडेललाई अर्थ मन्त्रालय सरुवा गरिएको छ । उक्त भन्सारमा प्रमुख पठाइएको छैन ।
कर र भन्सारका १० जना उपसचिवलाई अर्थ मन्त्रालय सरुवा गरिएको छ भने आन्तरिक राजस्व विभाग लाजिम्पाटमा १२ जना उपसचिवलाई निर्देशकको रुपमा पठाइएको छ । आन्तरिक राजस्व कार्यालय इटहरी र भैरहवाका कर अधिकृतहरु शान्तिराम निरौला र अुर्जनकुमार न्यौपानेलाई विमानस्थल भन्सार कार्यालय सरुवा गरिएको छ ।
विभानस्थलबाट सरुवा भएका प्रमुख भन्सार अधिकृतहरु गगनबहादुर बिकेलाई कोटेश्वर कर कार्यालय र श्रीधर टण्डनलाई दाङको कर अधिकृतमा सरुवा गरिएको छ । लामो समयदेखि भन्सार विभागमा निर्देशको भूमिकामा रहेका पुण्य विक्रम खड्कालाई आन्तरिक राजस्व कार्यालय भरतपुरको प्रमुखमा सरुवा गरिएको छ ।
कर अधिकृत कोटेश्वरका गणेशप्रसाद अर्यालय र कर अधिकृत जनकपुरका किशोर गर्तौलालाई भन्सार विभागको निर्देशकमा सरुवा गरिएको छ । गौतमवुद्ध अन्तर्राष्ट्रिय विमानस्थल भन्सार कार्यालय भैरहवाका प्रमुख टिकाराम गैरेलाई बुटवल कर प्रमुखमा सरुवा गरिएको छ । गौतमबुद्धमा नयाँ प्रमुख तोकिएको छैन ।