झापा, माघ २१ । ताप्लेजुङको पाथीभरा क्षेत्रमा केबलकार निर्माणलाई लिएर नो केबलकार पक्षधरहरुले आज पनि बन्द यथावत राखेका छन् ।
आज बिहान ५ः२० बजे झापाको दमक –४, आस्था टोलको प्रवेशद्वारअगाडि पूर्वपश्चिम राजमार्गमा ३–४ जना बन्दकर्ताहरुले सडकमा टायर बालेका हुन् । उक्त आगोलाई इलाका प्रहरी कार्यालय दमकबाट खटिएको प्रहरी टोलीले निभाएको छ । हिजो दमक, सुनसरीको इटहरीलगायत स्थानमा प्रहरी र आन्दोलनकारीबीच झडप भएको थियो ।
कोशी प्रदेश प्रहरी प्रवक्ता एसपी दीपक पोखरेलका अनुसार आइतबार दमकबाट ८ र सुनसरीबाट ६ जना गरी १४ जना प्रदर्शनकारीलाई प्रहरीले नियन्त्रणमा लिएको छ । दमकमा आन्दोलनकारीले प्रहरीको गाडीको सिसा फुटाएपछि एक राउन्ड हवाई फायर गरेको उनले दाबी गरे ।
पाथीभरा क्षेत्रमा केबलकार निर्माणलाई लिएर उत्पन्न विवाद समाधान गर्न संघ सरकारले वार्ता समिति गठन गरेको छ । गृह मन्त्रालयका सहसचिव प्रेमप्रसाद भट्टराईको संयोजकत्वमा गठित समितिमा संघीय मामिला तथा सामान्य प्रशासन मन्त्रालय, संस्कृति, पर्यटन तथा नागरिक उड्डयन मन्त्रालय र सहरी विकास मन्त्रालयका प्रतिनिधि रहेका छन् । यद्यपि बन्दकर्ताहरुले बन्द यथावत राखेका छन् ।
