झापा, फागुन ३ । विगत सात वर्षदेखि मेचीनगर नगरपालिका–१३ चारआलीस्थित प्रगति सामुदायिक वनको वनक्षेत्र अतिक्रमण गरी बनाइएका १८ वटा घर टहरा बल प्रयोग गरी हटाइएको छ ।
गत वर्षदेखि पटक पटक ठाउँ खाली गर्न गरेको आग्रहलाई बेवास्ता गरी अटेर गरेपछि डिभिजन वन कार्यालय झापाले आज बल प्रयोग गरेको हो । वन कार्यालयका ६० जना वनरक्षक र कर्मचारी , ३१ जना सशस्त्र प्रहरी , २९ जना जनपद प्रहरी र ५० जना सामुदायिक वन उपभोक्ता सदस्यहरु ती घर टहरा हटाउन परिचालन गरिएको थियो । डिभिजन वन कार्यालयको पहलमा डोजर लिएर सुरक्षाकर्मी पुग्दा स्थानीय व्यवसायीसँग केहीबेर विवाद भएको थियो । त्यहाँ व्यवसाय गर्ने मेचीनगर १३ की ३६ वर्षीया अनिता तामाङले प्रगति सामुदायिक वनका अध्यक्ष विकास निरौलालाई अभद्र व्यवहार गरेकी थिइन् । कालोमोसो दल्ने उनलाई पक्राउ गरी इलाका प्रहरी कार्यालय धुलावारी लगिएको छ । वनका अध्यक्ष निरौलालाई दुर्व्यवहार गरेर भागेकी ती महिलालाई महिला प्रहरीले नजिकैको सार्वजनिक शौचालयमा लुकेको अवस्थामा नियन्त्रणमा लिएको थियो ।
जेसीबी प्रयोग गरी १५ वटा घर, छाप्रो र घुम्ती तथा ३ वटा तरकारी पसल हटाइएको हो । दुर्गादेवी तामाङ, ऋतु कार्की दर्जी , तारा राजवंशी , बखत नेवार , गीता ठाकुर , खुबराज राजवंशी , आर्दुल हुसैन , शत्रुघन ठाकुर , विनोद शिवा , जयदा खातुन , मानिका राजवंशी , अनिता मगर ,संगिता राई , सरस्वती दुलाल र कला शिवाको घर, छाप्रो र घुम्ती हटाइएको मेची सब डिभिजन वन कार्यालय का वन अधिकृत सुरज निरौलाले बताए । बिहान करिव १० बजे जेसीबीसहित र वन समूहको टोली, सुरक्षाकर्मी आएका थिए ।सामान निकाल्न व्यवसायीहरुलाई ३० मिनेटको समय प्रदान गरिएको थियो । केही व्यवसायीहरुले सामान निकाल्न सुरु गरेका थिए भने केही अटेर गरी बसेका थिए ।
पूर्वपश्चिम राजमार्ग विस्तार हुँदा केही व्यवसायीहरुले राजमार्गसँग जोडिएको वन क्षेत्रमा आफ्नो व्यवसाय सारेका थिए । पछि अन्य व्यवसायीहरु थपिएर वन क्षेत्र अतिक्रमण गरेका थिए । उक्त स्थानमा तरकारी र माछामासु बजार सञ्चालन गर्दै आएका थिए । सशस्त्र प्रहरी, जनपद प्रहरी र वनरक्षक टोली परिचालन गरी अतिक्रमण हटाएर वनक्षेत्र खाली गराइएको डिभिजन वन कार्यालयका प्रमुख मेघराज राईले बताए ।
तीन पटक सार्वजनिक सूचना जारी गरी पटकपटक छलफल गर्दासमेत अतिक्रमण नहटाएपछि बाध्य भएर वनक्षेत्र सुरक्षित राख्न सुरक्षाकर्मी परिचालन गर्नुपरेको राईले बताए । २०८० सालको असार २२ गते प्रमुख जिल्ला अधिकारीको संयोजकत्वमा रहेको सुरक्षा समितिको बैठकले सो वनक्षेत्र खाली गराउने निर्णय गर्दै १५ दिने सूचना जारी गरेको थियो । त्यसपछि केही महिनाअघि दोस्रो पटक एक महिने सूचना जारी भएको थियो भने गत माघ २४ गतेदेखि सात दिनको म्याद दिएर अन्तिम पटक सूचना जारी गरिएको डिभिजन प्रमुख राईले बताए । वनक्षेत्रमा रहेको दुईवटा सार्वजनिक शौचालय पनि भत्काइने भएको छ । वडा कार्यालयले ती शौचालयको व्यवस्थापन गर्ने जनाइएको छ । खाली गराइएको वनक्षेत्र आज नै घेरावारा गरिसकिएको छ । त्यहाँ बृक्षरोपण गर्ने जनाइएको छ ।
वनक्षेत्र अतिक्रमण गरी पाउ पाथीभरा मन्दिर , किरातेश्वर र माङहिम निर्माण
प्रगति सामुदायिक वनकै वनक्षेत्र पाउ पाथीभरा मन्दिर , किरातेश्वर र माङहिमले अतिक्रमण गरेका छन् । धार्मिक पर्यापर्यटनका लागि निश्चित वनक्षेत्र दिन मिल्ने कानुनी व्यवस्था अनुसार ती धार्मिक स्थलहरुलाई लिजमा बस्न दिइएको हो । पाउ पाथीभरा मन्दिरले वार्षिक १६ लाख तथा किरातेश्वर र माङहिमले १५–१५ हजारका दरले वन समूहसंग लिजमा जग्गा लिएको समूहका अध्यक्ष निरौलाले जानकारी दिए । ती तीनवटा धार्मिक स्थलले ३.४५ हेक्टर वनक्षेत्र ओगटेका छन् । प्रत्येक वर्ष नवीकरण गर्नेगरी कार्ययोजना बनाएर ती धार्मिक स्थललाई रहन दिएको अध्यक्ष निरौलाले जानकारी दिए । ती धार्मिक स्थलले अब कुनै पनि संरचना निर्माण गर्न पाउने छैनन् ।
