झापा, जेठ २९ । किसान आन्दोलनको रुपमा शुरुवात भएको नेपाली राजनीतिमा चर्चित २०२८ सालको झापा विद्रोहकै जश लिएर प्रधानमन्त्री केपी शर्मा ओलीले सत्ताभोग गरेको दशकौं भइसक्यो । सर्वहाराको नाममा सिंहदरबार पुगेका उनीलगायतका नेताहरुले तिनै किसानलाई उपेक्षा गरेपछि झापामा ५४ वर्षपछि फेरि किसान आन्दोलन व्युँतिएको छ । प्रधानमन्त्री ओलीकै निर्वाचन क्षेत्र झापा ५ बाट किसानहरु आन्दोलित भएका हुन् ।
करिव एक महिनाअघि चक्काजामबाट आन्दोलन शुरु गरेका गौरादहका किसानहरुले आज राँके जुलुस प्रदर्शन गरेका छन् । किसान संघर्ष समिति झापाको आव्हानमा विभिन्न नाराबाजी गर्दै हात–हातमा राँको र पुल्ठो बालेर र्याली गौरादह नगरपालिकातर्फ जाँदा प्रहरीले राँको खोसेर निभाएको थियो ।
त्यसपछि र्याली गौरादह नगरपालिकाको गेटमा पुगी भित्र प्रवेश गर्न खोज्दा प्रहरीसंग घम्साघम्सी परेको थियो । त्यसक्रममा किसान संघर्ष .समितिका अध्यक्ष इन्द्रप्रसाद पोखरेलको सेतो कमिज च्यातिएको छ । आन्दोलनमा सहभागी किसानहरुले प्रहरीले अध्यक्षको लुगा च्यातेकोमा घोर आपत्ति जनाउँदै प्रहरी दमनको बिरोध गरेका छन् ।
उनीहरुले गौरादह नगरपालिकाभित्र प्रवेश गरी कार्यालयको गेट अगाडी धर्ना दिएर कोणसभा गरेका छन् । विभिन्न १५ बुँदे मागसहितको व्यानर गौरादहका नगर प्रमुख छत्रपति सुवेदी र उपप्रमुख जलवर्षा राजवंशीलाई हस्तान्तरण गरेका छन् । आफ्ना मागहरु चाँडोभन्दा चाँडो पुरा गर्नु पर्ने भन्दै उनीहरुले माग पूरा नभए अझ कडा संघर्षका कार्यक्रमहरु सार्वजनिक गर्ने चेतावनी दिएका छन् ।
चरणवद्ध आन्दोलनमा रहेका किसानहरुले पहिलो चरणमा दुई पटक चक्काजाम गरेका थिए । त्यसपछि राति आ–आफ्नो घर अगाडि राँको बाल्ने र व्लाक आउट गर्ने कार्यक्रम गरेका थिए ।
उनीहरुले उत्पादनमा अनुदान कार्यक्रमको क्षेत्र बिस्तार र बजेट व्यवस्थापन सुनिश्चतता हुनुपर्ने, सरकारले तोकेको खाद्यान्नको मूल्य पाउनुपर्ने , रासायनिक मल, खादको उचित व्यवस्था हुनुपर्ने ,. कृषि पशुपंछी, मत्स्य, मौरी खेती वालीको निःशुल्क बिमा गर्नुपर्ने , कृषि ऋणको वातावरण हुनुपर्ने , व्यवसायिक उद्यमी कृषकहरुलाई कृषियन्त्र उपकरण वितरण गर्नुपर्ने , कृषि सिंचाई महशुल पुरै छुट हुनुपर्ने , सबै वडामा कृषि बिज्ञ प्राविधिक नियुक्त गरिनुुपर्ने , भाडामा चल्ने कम्पाईन हार्भेस्टरको दर रेटमा एकता हुनुपर्ने , अनुदानको नाममा किसानहरुबाट रकम उठाउने धन्दा बन्द गरिनु पर्ने , कृषि औजार खरिद गर्न भन्सार छुटको सिफारिसको व्यवस्था गरी खुल्ला बजारको व्यवस्था गरिनु पर्ने , कृषकहरुलाई नयाँ सीप विकासका लागि अध्ययन अवलोकन भ्रमणका लागि रु.५ लाख बजेटको विनियोजन गरिनु पर्ने ,. मालपोतको दर रेटमा पुनर्बिचार गरिनुपर्ने , कृषि उपयोग बजारको मूल्यबृद्धि रोकथाम गर्नुपर्ने र वडास्तरीय कृषक समूहमार्फत कृषकहरुको लागि बजेट र कार्यक्रमहरु ल्याइनु पर्ने माग राखेका छन् ।
संघर्ष समितिका अध्यक्ष पोखरेल र प्रबक्ता खेमराज अधिकारीको अगुवाईमा निकालिएको र्यालीमा गौरादह, कमल र गौरीगञ्जका करिव २ सय किसानहरुको सहभागिता रहेको थियो ।
