झापा , असार २ । झापामा फेरि जंगली हात्ती मृत फेला परेको छ ।
आज बिहान अन्दाजी ९.४५ बजे मेचीनगर नगरपालिका वडा नम्बर १ कोसेली चोकस्थित लिलाप्रकाश रिजालको मकैबारीमा पोथी हात्ती मृत फेला परेको हो । मृत्युको कारण खुल्न सकेको छैन । आवश्यक अनुसन्धानका लागि डिभिजन वन कार्यालय झापाबाट टोली जाँदै गरेको जनाइएको छ ।
यसअघि जेठ १९ गते राति कमल गाउँपालिका वडा नं–३ मा रहेको रतुवामाई बृक्षरोपण आयोजनाको जंगलमा करेन्ट लागेर हात्ती मरेको थियो । त्यसको दुई साताअघि जेठ ७ गते बुद्धशान्ति–५ को पाँचपोखरी सामुदायिक वनमा जंगली हात्ती मृत फेला परेको थियो ।
योसंगै यस आर्थिक वर्षमा झापामा चारवटा जंगली हात्ती मरेका छन् । गत आर्थिक वर्षमा पनि जिल्लामा ४ वटा हात्ती मृत फेला परेका थिए । त्यस्तै यस आर्थिक वर्षमा हात्तीको आक्रमणमा परी झापामा चार जनाको ज्यान गइसकेको छ ।
