झापा, असार ६ । आक्रमण गर्ने उद्धेश्यले विभिन्न हतियारसहित नेपाल प्रवेश गरेका एक भारतीयलाई प्रहरीले काँकरभिट्टाबाट पक्राउ गरेको छ । 
आज साँझ ७.२० बजे भारत दुर्गानगर सिलिगुडी बस्ने ३५ वर्षीय जयप्रकाश कुमार पाठकलाई एयर पेस्तोल , म्याग्जिन र खुकुरीसहित काँकरभिट्टा बसपार्कमा पक्राउ गरिएको हो ।
इलाका प्रहरी कार्यालय काँकरभिट्टाबाट खटिएको प्रहरी टोलीले गोप्य सूचनाको आधारमा भारतीय नागरिक पाठकलाई डब्लुबी ७० जी ३२३२ नम्बरको TUV३०० मोडलको कारसहित फेला पारेको थियो ।
गाडीसहित नियन्त्रणमा लिई चेकजाँच गर्दा उक्त गाडीको चालक बस्ने सिटमुनि लुकाई राखेको अवस्थामा STAR RX ( IN XAMPL CO२ ००१९०७ ४.५ MM) MADE IN INDIA लेखिएको कालो रंगको म्याग्जिनसहितको एयर पेस्तोल फेला परेको थियो । चालु अबस्थामा रहेकोे म्याग्जिन खोली हेर्दा एयर वुलेट जस्तो देखिने ५ राउन्ड , चालक बस्ने सिटदेखि बायाँतर्फको सिटमुनि दुवै साईडमा १–१ थान दावसहितको २ थान खुकुरी पनि फेला परेको थियो ।
त्यस्तै पाठकको शरीरबाट रेडमी कम्पनीको स्क्रिनटच मोवाइल १ थान, सामसुङ कम्पनीको मोवाइल १ थान, उनको परिचय खुल्ने कागजात र गाडीको कागजपत्र फेला परेको छ ।
ती भारतीय नागरिक कसैलाई आक्रमण गर्न आएको हुनसक्ने आशंका गरिएको छ । त्यसबारे अनुसन्धान भइरहेको जिल्ला प्रहरी कार्यालयका प्रवक्ता डीएसपी खगेन्द्र खड्काले बताए । अवैध हतियारसहित पाठकलाई नियन्त्रणमा लिई इप्रका काँकरभिट्टामा राखिएको छ ।
