झापा, असार ११ । निजी गाडीमा भारतबाट लागूऔषध ओसार पसार गर्ने चारजना कारोबारी फेरि पक्राउ परेका छन् ।
आज दिउँसो २ बजे गोप्य सूचनाको आधारमा वडा प्रहरी कार्यालय भद्रपुरबाट खटिएको प्रहरी निरीक्षक लोककृष्ण दाहालको कमाण्डमा रहेको टोलीले भद्रपर नगरपालिका वडा नं ७ आनी मार्गमा बा.प्र. ०१-०२५च ०८७७ नं. को हुन्डाई कम्पनीको क्रेटा कारलाई रोकेर चेकजाँच गर्दा २०० ग्राम ३९० मिलिग्राम ब्राउनसुगर फेला परेको थियो । सो लागूऔषधसहित प्रहरीले नुवाकोट बेलकोटगढी नगरपालिका वडा नम्बर १३ बस्ने वर्ष ३१ का साजन तामाङ , बेलकोटगढी नगरपालिका वडा नम्बर १ बस्ने वर्ष २० का सजिन लामा , बेलकोटगढी नगरपालिका वडा नम्बर १३ बस्ने वर्ष ३३ का दिपेश लामा र बेलकोटगढी नगरपालिका वडा नम्बर १ बस्ने वर्ष २३ का राम तामाङलाई पक्राउ गरेको हो ।
उनीहरुलाई जिल्ला प्रहरी कार्यालयमा आज पत्रकार सम्मेलन गरी सार्वजनिक गरिएको छ । लागूऔषध नियन्त्रण ऐन २०३३ बमोजिम कसूरको अनुसन्धानको लागि आजै जिल्ला अदालत झापामा उपस्थित गराइ सात दिनको म्याद थप भई जिल्ला प्रहरी कार्यालय झापाबाट अनुसन्धान तथा कारवाही भैरहेको प्रहरी उपरीक्षक राजन लिम्बूले बताए ।
यसअघि असार ७ गते बा प्र ०१–०३० से ७७९३ नं. को नेटा इभीमा ४७ ग्राम ६९० मिलिग्राम लागूऔषध ब्राउनसुगर ल्याउँंदै गरेको अवस्थामा काठमाण्डौ वडा २६ बस्ने वर्ष २४ का निवेश कुँवर र लम्जुङ कोलासोतार वडा नं. ७ बस्ने वर्ष २२ की नोजिना रानालाई कारसहित नियन्त्रणमा लिई आवश्यक अनुसन्धान भइरहेको छ।
त्यस्तै गत बैशाख ३१ गते गौरीगंज गाउँपालिका वडा नं. ३ गौरीगंज बजारबाट लागूऔषध कारोबारमा संलग्न दमकका भुपेन्द्र राई, भारत बस्ने भोला ठाकुर र मोनाजिर आलमलाई १०० ग्राम ०९० मिलिग्राम ब्राउनसुगरसहित नियन्त्रणमा लिइएको थियो । उनीहरुले सो अवैध कार्यका लागि ना. १ च ९१६२ नम्बरको हुन्डाई १०० कार र भारतीय नम्बर प्लेटको मोटरसाइकल प्रयोग गरेका थिए ।
