बिर्तामोड, असार ११ । नयाँ भेरिएन्ट फैलिएयता झापा बिर्तामोडकी अर्की महिलालाई पनि कोरोना संक्रमण पुष्टि भएको छ ।
आज दिउँसो बिर्तामोड १ बस्ने ३५ वर्षीया महिला बिरामी भई बिर्तासिटी अस्पतालमा कोभिड चेक गराउँदा उनलाई पोजेटिभ देखिएको हो । ती महिलाई थप उपचारको लागि नोबेल अस्पताल बिराटनगर रेफर गरिएको छ ।
यसअघि पहिलो पटक गत जेठ ११ गते बिर्तामोड ५ की ५२ वर्षीया महिलालाई कोरोना संक्रमण पुष्टि भएको थियो । त्यसपछि पूर्वी नाका काँकरभिट्टा हुँदै नेपाल प्रवेश गरेका दोलखाका ४७ वर्षीय पुरुषलाई संक्रमण पुष्टि भएको थियो ।
त्यस्तै तीन दिनअघि मेचीनगर ९ का ४३ वर्षीय पुरुषलाई कोरोना देखिएको छ । नयाँ भेरिएन्ट फैलिएयता एक महिनाको अवधिमा झापामा चारजनालाई कोरोना संक्रमण पुष्टि भएको हो ।
नयाँ भेरिएन्ट फैलिएयता देशमै पहिलो पटक कोरोना संक्रमणबाट इलामकी एक महिलाको मृत्यु भएको छ ।
सूर्योदय नगरपालिका वडा नं १० फिक्कल बस्ने ४९ वर्षीया महिलाको कोरोना संक्रमणबाट मृत्यु भएको हो । हिजो बिहान ६ बजे नोबेल शिक्षण अस्पताल बिराटनगरमा उपचारको क्रममा उनको मृत्यु भएको हो ।
ज्वरो आउने बिरामी भई स्थानीय अस्पतालमा उपचार गराउँदा ठिक नभएपछि दुई दिनअघि उनलाई बिर्तामोडस्थित बिर्ता सिटि अस्पतालमा ल्याई सोमवार चेकजाँच गर्दा कोरोना पोजेटिभ देखिएको थियो । त्यसपछि थप उपचारको लागि उनलाई विराटनगर लगिएको थियो ।
इपिडिमियोलोजी तथा रोग नियन्त्रण महाशाखाका अनुसार पछिल्लो पटक २०८० साल वैशाख २१ गतेदेखि कोरोना सङ्क्रमणका कारण कसैको मृत्यु भएको थिएन । महाशाखाको तथ्याङ्क अनुसार २४ घण्टामा सात जनामा कोरोना पुष्टि भएको मध्ये एक जना सङ्क्रमितको मृत्यु भएको हो । नेपालमा पुषयता २५ जिल्लाबाट १८८ जनामा कोरोना पुष्टि भएका छन्। कोरोना सङ्क्रमण सबैभन्दा बढी बागमती प्रदेशमा १४७, कोशी प्रदेशमा आठ, मधेश प्रदेशमा पाँच, गण्डकी प्रदेशमा तीन र सुदूरपश्चिम प्रदेशमा २१ जना छन् ।
