झापा, असार २५ । झापाको बाह्रदशीमा भएको दुर्घटनामा मृत्यु हुने दुवै चालकको पहिचान खुलेको छ ।
सो दुर्घटनामा स्कुटर चालक कचनकवल ३ डाकुपारा बस्ने ६० वर्षीय श्रीप्रसाद राजवंशी र मोटरसाइकल चालक भारत जिल्ला किशनगंज डिघलबैक थाना करलाबारी –१४ बस्ने २७ वर्षीय सुरज टुडूको मृत्यु भएको हो । स्कुटरमा सवार राजवंशीकी बुहारी २७ वर्षीया उर्मिला राजवंशी र नाति ७ वर्षीय आयुष राजवंशी गंभीर घाइते भएका छन् । उनीहरुको बीएण्डसी अस्पताल बिर्तामोडमा उपचार भइरहेको छ ।
आज दिउँसो ३.४० बजे बाह्रदशी गाउँपालिका १ खयरबारीस्थित भित्री सडकखण्डमा राजगढबाट कुटीतर्फ जाँदै गरेको बीआर ३७ एजेड ६४४० नम्बरको मोटरसाइकल र बिपरीत दिशाबाट आउँदै गरेको प्र.१–०१–०१६ प ९२७० नम्बरको स्कुटर एकापसमा जुध्दा दुवै चालकको मृत्यु भएको हो ।
स्कुटर चालक राजवंशी र मोटरसाइकल चालक टुडूलाई उपचारको लागि प्रादेशिक अस्पताल भद्रपुर पठाइएकोमा दिउँसो ४.४० बजे दुबै चालकको मृत्यु भएको जिल्ला प्रहरी कार्यालयले जनाएको छ । मृतकहरुको शव सोही अस्पतालमा रहेको छ ।
