झापा,असार २६ । मोरङको उखुबारीबाट ठूलो परिमाणमा गाँजा बरामद भएको छ ।
धनपालथान गाउँपालिका–१ गदिया खोलानजिकै उखुबारीमा ८ सय २ किलो गाँजा फेला परेको हो । मोरङ प्रहरी प्रवक्ता डीएसपी कोपिला चुँडालका अनुसार इलाका प्रहरी कार्यालय रंगेली, प्रहरी चोकी गडेरिया, प्रहरी चौकी अमाहिवरियाती र सशस्त्र प्रहरी बलको बीओपी नोचाबाट खटिएको संयुक्त टोलीले गाँजा बरामद गरेको छ ।
गाँजा लुकाएर राखिएको विशेष सूचनाका आधारमा बरामद गर्न नेपाल र सशस्त्र प्रहरीको संयुक्त टोली खटिएको थियो । संयुक्त टोलीले २६ वटा बोराभित्र प्याक गरेर राखेको अवस्थामा उखुबारीबाट ८ सय २ किलो गाँजा बरामद गरिएको डीएसपी चुँडालको भनाइ छ ।
अन्यत्र पनि गाँजा लुकाएर राखिएको हुनसक्ने आशंकामा खोजी तीव्र पारिएको उनले बताइन् । बरामद भएको गाँजा आवश्यक अनुसन्धानका लागि इलाका प्रहरी कार्यालय रंगेलीमा राखिएको छ । गाँजा कसले लुकाएको हो भनेर यकिन छैन । गाँजाको धन्दामा संलग्न भने पक्राउ परेका छैनन् । खोजी तीव्र पारिएको प्रहरीको भनाइ छ । प्रहरीका अनुसार पूर्वी पहाडी जिल्लामा उत्पादन हुने गाँजा भारत कटाउनका लागि उखुबारीमा भण्डारण गरेर राखिएको हुनसक्ने प्रहरीको भनाइ छ ।
