झापा,असार २६ । झापा बिर्तामोडको रामचौकमा एक व्यक्तिको ज्यान जानेगरी ठक्कर दिएर फरार भएको हायस काँकरभिट्टा बसपार्कमा भेटिएको छ ।
गएराति १०.४५ बजे बिर्तामोड –२ रामचौकस्थित सडक छेउमा पहिचान नखुलेको सवारी साधनको ठक्करबाट सप्तरी सुरुङ्गा नगरपालिका १ बस्ने ३८ वर्षीय रामबहादुर भुजेल गंभीर घाइते भएका थिए । इलाका प्रहरी कार्यालय बिर्तामोडबाट खटिएको प्रहरी टोलीले गस्ती गर्ने क्रममा गम्भीर अबस्थामा भुजेललाई फेला पारी उपचारको लागि बिर्तासिटी अस्पताल लिएर गएको थियो । अस्पतालमा पुर्याउनासाथ डाक्टरले चेकजाँच गर्दा उनको मृत्यु भइसकेको थियो ।
फरार सवारी साधनको खोजतलास गर्दै जाँदा घटनामा संलग्न बा ५ ख ६८०३ नं. को हायस र त्यसका चालक मकवानपुर थाहा नगरपालिका ७ बस्ने २७ वर्षीय रोशन तामाङलाई आज दिउँसो १२ बजे काँकरभिट्टास्थित बसपार्कबाट नियन्त्रणमा लिएको जिल्ला प्रहरी कार्यालयले जनाएको छ । हायससहित तामाङलाई अनुसन्धानको लागि इप्रका बिर्तामोडमा राखिएको जिल्ला प्रहरी कार्यालयका प्रवक्ता डीएसपी खगेन्द्रबहादुर खड्काले बताए ।
