झापा, असार २७ । गत असार २२ गते कार्यालयनजिकै झुण्डिएर आत्महत्या गरेका झापाको दमक –४ स्थित भट्टराई कुल वंश प्रतिष्ठानका कार्यालय सचिव दिपेन्द्र भट्टराईले प्रतिष्ठान कार्यसमितिको दबाबका कारण आत्महत्या गरेको आशंका गरिएको छ ।
दिपेन्द्रले आत्महत्या गर्दा लेखेको सुसाईड नोटमा समेत कार्यालयबाट तीन महिनाको तलब पाउन बाँकी रहेको लेखिएको थियो । त्यसैगरी प्रतिष्ठान परिसरमा निर्माणाधीन संरचनाहरुको भुक्तानीका लागि निर्माण समिति हुँदाहुँदै कार्यालय सचिवको नाममा पेश्की रकम निकाल्न लगाएको खुल्न आएको छ ।
निर्माण समितिले पेश्की रकम लिकालेर ठेकेदारलाई भुक्तानी गर्नु पर्नेमा कार्यालय सचिवको नाममा लाखौं रकम पेश्की निकालेर समितिले रकम लिएको र पश्की फर्छ्यौटको लागि कार्यालय सचिवलाई दबाब दिएको जनाइएको छ ।
प्रतिष्ठानको खातामा करोडौं रकम भएपनि तीन महिनादेखिको तलब भुक्तानी नदिनु र निर्माण समितिलाई बुझाएको रकमलाई समेत पेश्की फर्छ्यौटका लागि दबाब दिँदा दोहोरो तनाबमा परेका दिपेन्द्रले सोहि कारण आत्महत्या गरेको हुनसक्ने बताइएको छ ।
गत असार २२ गते अपरान्ह ४ बजे भट्टराई प्रतिष्ठानको कम्पाउण्डभित्र रहेको बाँसको झ्याङमा सोही ठाउँ बस्ने ५३ वर्षीय कार्यालय सचिव दिपेन्द्रले नाइलनको डोरीको पासो लगाई आत्महत्या गरेका हुन् ।भट्टराईले आत्महत्या गरेको बिषयमा अनुसन्धान भइरहेको प्रहरीले जनाएको छ ।
