झापा, असार ३२ । झापा अर्जुनधाराका ९६ परिवार अव्यवस्थित बसोबासीहरुलाई जग्गा धनीपुर्जा वितरण गरिएको छ ।
प्रतिनिधि सभाका सभामुख देवराज घिमिरेले अव्यवस्थित बसोबासीहरुलाई जग्गा धनीपुर्जा वितरण गरेका हुन् । राजस्व तिरेर योग्य बनेका १२८ घर परिवारमध्ये ९६ परिवारलाई धनीपुर्जा बितरण गरिएको हो ।
झापा क्षेत्र नं २ का सांसदसमेत रहेका सभामुख घिमिरेले अव्यवस्थित बसोबासीहरुलाई जग्गाधनी पुर्जा बितरण गर्न पाउँदा अत्यन्तै खुसी लागेको बताउँदै नगरका सबै अव्यवस्थित बसोबासीहरुलाई क्रमशः धनीपुर्जा बितरण गरिने जानकारी दिए । उनले अर्जुनधारा नगरपालिकामा रहेका जग्गासम्बन्धी जटिल समस्याहरू समाधानका लागि कानुनी अड्चन रहेकोले समाधानको बाटो खोज्नु पर्ने धारणा राखे । यी समस्या समाधानको मुख्य उपायको रूपमा संसदमा पेश भएको “भूमि सम्बन्धी विधेयक“ भएकोले त्यसलाई यही बर्खे अधिवेशनमा पारित गर्न कोशिस गरिने उनको भनाई छ । उक्त कानुन बनेपछि करिब ९० प्रतिशतभन्दा बढी भूमिसम्बन्धी समस्या समाधान हुने उनले दावी गरे ।
भूमि व्यवस्था, सहकारी तथा गरिबी निवारण मन्त्री बलराम अधिकारीले २०२१ सालको पुरानो भूमि ऐनले वर्तमानका जटिलतालाई सम्बोधन गर्न नसक्ने भएकाले नयाँ कानुनको आवश्यकता रहेको बताए । उनले आयोगले भूमिहीन दलित÷सुकुम्बासीलाई पौने छ कठ्ठासम्म निःशुल्क र अव्यवस्थित बसोबासीलाई तोकिएको राजस्व लिएर जग्गा दिने नीति स्पष्ट रहेको जानकारी दिए । विगतका आयोगहरूले अधुरो छोडेका कामलाई समेत अहिलेको आयोगले टुङ्ग्याउने अधिकार पाएको उनको भनाई छ ।
अर्जुनधारा नगरपालिकाको आयोजनामा भएको जग्गा धनीपुर्जा वितरण कार्यक्रममा अर्जुनधारा नगरपालिका प्रमुख बलदेवसिंह गोम्देनको अध्यक्षता रहेको थियो । कार्यक्रममा भूमि समस्या समाधान आयोगका केन्द्रीय अध्यक्ष हरिप्रसाद रिजाल ,कोशी प्रदेशका पूर्व मुख्यमन्त्री उद्धव थापा,संविधानसभा सदस्य तथा नेकपा एमाले जिल्ला समिति अध्यक्ष प्रेम गिरी,प्रदेश सभा सदस्य चिन्तन पाठक, कांग्रेसका जिल्ला सभापति देउकुमार थेबे , सुरक्षा निकायका प्रमुखहरुलगायतको उपस्थिति रहेको थियो ।
