झापा, साउन १० । झापाको भद्रपुरमा प्रहरीको मोटरसाइकलको ठक्करबाट एक बालक गंभीर घाइते भएका छन् ।
हिजो साँझ ६.२० बजे भद्रपुर नगरपालिका वडा न. ८ किरात कोलोनीमा डिउटीबाट कोठा जाने क्रममा प्रहरी सहायक हवल्दार दिपक खत्रीले चलाएको बा.प्र.०२–०४० प ३१५० नम्बरको मोटरसाइकलले बालकलाई ठक्कर दिएको हो ।
बिर्तामोड ६ पुष्पलाल चोक बस्ने नारायण न्यौपानेका छोरा ६ वर्षीय प्रनिस न्यौपाने म्याजिक भेनबाट ओर्ली बाटो क्रस गर्ने क्रममा मोटरसाइकलले ठक्कर दिएको थियो । टाउकोमा चोट लागेका बालकलाई उपचारका लागि बीएण्डसी अस्पताल लगिएकोमा थप उपचारका लागि नोवेल अस्पताल विराटनगर रेफर गरिएको छ ।
दुर्घटनामा प्रहरी सहायक हवल्दार खत्री पनि घाइते भएका छन् । प्रहरी चौकी मानेभञ्ज्याङ भोजपुर संचार दरबन्दी भई जिल्ला प्रहरी कार्यालय झापामा कार्यरत खत्रीलाई ओमसाई पाथिभरा अस्पताल भद्रपुरमा लगिएकोमा त्यहाँबाट थप उपचारको लागि बीएण्डसी अस्पताल रेफर गरिएको छ ।
त्यस्तै आज दिउँसो बिर्तामोड २ बयरचोकस्थित पूर्वपश्चिम राजमार्गमा दुईवटा मोटरसाइकल एक आपसमा ठक्कर खाँदा दुईजना घाइते भएका छन् । दिउँसो १ बजे सुरूङगाबाट बिर्तामोडतर्फ आउँदै गरेको को ३१ प ३८५९ न.को मोटरसाइकल र बिपरीत दिशाबाट जाँदै गरेको मे ९ प ९००८ नं को मोटरसाइकल एक आपसमा ठक्कर खाई दुर्घटना भएको हो । दुर्घटनामा को. ३१. प. ३८५९ न.को मोटरसाइकल चालक मोरङ सुन्दरहरैचा १२ बस्ने १७ वर्षीय राज न्यौपाने र सोही मोटरसाइकलमा पछाडी सवार पाँचथर फिदिम १२ बस्ने ४७ वर्षीय गंगाराम बन्जारा घाइते भएका छन् । दुबै घाईतेलाई उपचारको लागि बीएण्डसी अस्पताल बिर्तामोड पठाइएको छ ।
मे ९ प ९००८ नं को मोटरसाइकल चालक तत्काल नामथर वतन नखुलेका व्यक्ति मोटरसाइकल छाडेर फरार भएकाले खोजतलास भइरहेको जिल्ला ट्राफिक प्रहरी कार्यालय झापाले जनाएको छ । दुबै मोटरसाइकल इलाका प्रहरी कार्यालय बिर्तामोडको नियन्त्रणमा रहेको छ ।
