झापा, साउन १० । प्रहरीले झापाको भद्रपुरमा लागूऔषध कारोबारी पक्राउ गर्ने क्रममा गोली चलाएको छ ।
भद्रपुर ५ मा आज दिउँसो प्रहरीले गोली चलाएर एकजना भारतीय लागूऔषध कारोबारी पक्राउ गरेको हो ।
दिउँसो ३.५० बजे भद्रपुर ५ भद्रपुर बजारस्थित भित्री सडकखण्डमा लागूऔषधको कारोवार भइरहेको भन्ने गोप्य सूचनाको आधारमा जिल्ला प्रहरी कार्यालय झापावाट प्रहरी निरीक्षक विजय चौहान र लागूऔषध नियन्त्रण व्युरो काँकरभिट्टावाट प्रहरी नायव निरीक्षक सोमेश लामिछानेको कमाण्डमा संयुक्त टोली खटिएको थियो । शंकास्पद अवस्थामा हिडिरहेका भारत किसनगंज जिल्ला कोल्लिकोट थाना बस्ने ३६ वर्षीय मोहमद इस्लामले प्रहरीलाई देख्नेवित्तिकै प्रहरीलाई नै आक्रमण गरि भाग्न खोजेका थिए । त्यसक्रममा प्रहरीले दुईवटा पेस्तोलवाट १।१ राउण्ड प्रहार गर्दा एउटा पेस्तोलवाट १ राउण्ड उनको बायाँ खुट्टाको घुँडामुनि लागेको हो ।
उनको साथवाट प्लाष्टिकबाहेक १०७ ग्राम १०० मिलिग्राम ब्राउनसुगर फेला परेको जिल्ला प्रहरी कार्यालयले जनाएको छ । घाइतेको प्रहरी निगरानीमा प्रादेशिक अस्पताल भद्रपुरमा उपचार भइरहेको प्रहरी निरीक्षक विजय चौहानले जानकारी दिएका छन् । झापामा लागूऔषध कारोबारी पक्राउ गर्न योसहित प्रहरीले चार पटक गोली प्रहार गरिसकेको छ ।
