झापा,साउन १० । साइकोलोजिकल थ्रिलर जनरामा निर्माण भएको चलचित्र ‘द ब्ल्यू लाइट’को फष्टलुक्स सार्वजनिक भएको छ ।
चलचित्रकी मुख्य पात्र अभिनेत्री बेनिशा हमालको शनिबार परेको जन्मदिनको अवसर पारेर निर्माण पक्षले फष्टलुक्स सार्वजनिक गरेको हो ।
मंसिर १२ गते रिलिज हुने चलचित्रको टिजरमा मनोवैज्ञानिक तनावमा रहेका पात्रहरू प्रस्तुत छन् । आफ्नो बुवाको मृत्यु भएको सपना डराइ डराई बुवालाई सुनाइरहेकी छोरी र उनलाई डरबाट बाहिर निकाल्न खोजिरहेको बुवाबाट पहिलो झलक सुरु हुन्छ । बुवाले छोरीलाई उनको डर दूर गराउन सपनामा मरेको देखेको मान्छेको आयु लामो हुन्छ भन्दै कन्भिन्स गर्छन् ।
त्यसपछि आफूलाई कमजोर भएको महसुस गरेपछि कठोर र साहसी बनाउन हतियार लिएर हिँडिरहेकी युवती र चाल सुनिरहेकी अर्की युवतीबिचको डर र डर हटाउन गरेको प्रयास छ । फष्टलुक्समा बेनिशासँगै अर्पण थापा र सृष्टि श्रेष्ठ छन् । तीनै जना तनावपूर्ण भावमा छन् । एंग्री लुक्समा रहेकी सृष्टि श्रेष्ठको हातमा आलो रगत लतपतिएको बन्चरो छ । उनले भर्खरै बन्चरो कसैमाथि प्रहार गरेको अनुमान लगाउन सकिन्छ ।
‘द ब्ल्यू लाइट’लाई बलिराम चौहानले निर्देशन गरेका हुन् । चलचित्रमा बेनिशा, अर्पण थापा, सृष्टिका अलवा महेश त्रिपाठी, आयुशमान देशराज जोशी, सुरक्षा इटानीको अभिनय छ ।
