कचनकवल,साउन १४ । कचनकवल गाउँपालिका–३ स्थित पथरिया माध्यमिक विद्यालयका व्यवस्थापन समिति अध्यक्ष जयनारायण यादवमाथि शिक्षक सरुवाबापत ३ लाख रुपैयाँ घुस लिएको प्रकरण सार्वजनिक भएको निकै भयो । सामाजिक सञ्जालमा समेत चर्चामा आएपछि व्यापक आलोचना भयो, तर स्थानीय सरकार र सम्बन्धित निकाय भने अझै मौन देखिएका छन्।
ताप्लेजुङमा कार्यरत एक शिक्षकले पथरिया माविमा रिक्त रहेको दरबन्दीमा सरुवाको लागि निवेदन दिएका थिए। उक्त विद्यालय आफ्नो घरनजिक पर्ने भएकाले शिक्षकले नियमअनुसार निवेदन दिएका थिए। निवेदन परेपछि अध्यक्ष यादवले “वातावरण मिलाउनु पर्छ” भन्दै शिक्षकलाई बोलाएका थिए। जब शिक्षकले “कस्तो वातावरण?“ भनी सोधे, यादवले खुलेआम “३ लाख रुपैयाँ” घुस माग गरेका थिए।
ती शिक्षकका अनुसार, अन्तिम समयमा फर्केर ताप्लेजुङ जान गाह्रो भएपछि उनी ३ लाख रुपैयाँ बुझाउन बाध्य भए। तर पछि यादवले त्यो दरबन्दीमा अरूले बढी रकम दिएको भन्दै ती शिक्षकको सरुवा रोकिदिएका थिए। त्यसपछि पुनः अर्को स्थानमा सरुवा मिलाइदिने भन्दै समय सार्दै शिक्षकलाई झुलाउँदै आए ।
अन्ततः लामो समयसम्म न सरुवा गरिदिए, न रकम फिर्ता गरेपछि पीडित शिक्षकले सामाजिक सञ्जालमा उक्त घटनाबारे सार्वजनिक गरे। सो पोस्टपछि यादवले पैसा राखिएको बिटो आफ्नो घरमा फ्याँकेर भागेको ती शिक्षकले बताएका छन्।
यस्तो गम्भीर प्रकृतिको घटना सार्वजनिक भइसके पनि यादवलाई विद्यालय व्यवस्थापन समितिबाट हटाउने कुनै प्रक्रिया सुरु भएको छैन। स्थानीय एक व्यक्तिले बताएअनुसार, यादव आफूलाई सत्तारूढ दलको कार्यकर्ता भन्दै कसैले हटाउन नसक्ने दाबी गर्छन्।
स्थानीय सरकारले विकास र समृद्धिको नारासँगै “भ्रष्टाचारमा शून्य सहनशीलता” को दाबी गर्दै आएको भए पनि अध्यक्ष यादवको निरन्तरताले त्यो दाबीलाई गिज्याइरहेको स्थानीयबासीको टिप्पणी छ।
सम्बन्धित निकाय र स्थानीय सरकारको ध्यान आकर्षण गराउँदै, सार्वजनिक निकायमा पारदर्शिता र जवाफदेहिताको पुनः माग उठेको छ।
