कुमरखोद , साउन १५ । कारितास नेपालले झापा गाउँपालिकामा संचालन गरेको चार दिवसीय तालिम सम्पन्न भएको छ ।
असुरक्षित वैदेशिक रोजगार र मानव बेचबिखन विरुद्धको अभिमुखीकरण तथा नेतृत्व विकास र सार्वजनिक वक्तृत्वकलासम्बन्धी तालिम संचालन गरिएको थियो । मिसियो जर्मनी तथा झापा गाउँपालिकाको आर्थिक सहयोगमा गाउँपालिकाको वडा नं ६ स्थित जनता माध्यमिक विद्यालयको सभाहलमा भएको कार्यक्रममा विद्यालय व्यवस्थापन समितिका अध्यक्ष मनकुमार मिश्रको अध्यक्षता तथा झापा गाउँपालिकाका कार्यवाहक अध्यक्ष अन्जुदेवी थपलियाको प्रमुख आतिथ्य रहेको थियो ।
कारितास नेपालले झापा गाउँपालिका विभिन्न वडाहरुमा यस किसिमका कार्यक्रमहरु संचालन गरिरहेको छ । कारितास नेपालका सिनियर सोसियल मुभिलाइजर विवेक शिवाकोटीले सुरक्षित आप्रवासनको आधार, सूचना र सीपसहित रोजगारको नारालाई आत्मसात गर्दै असुरक्षित वैदेशिक रोजगार र मानव बेचबिखनविरुद्ध तालिम दिएका थिए । यसैगरी प्रशिक्षक हिमा शिवाकोटीले नेतृत्व विकास र सार्वजनिक वक्तृत्वकला सम्वन्धी विद्यार्थीहरुलाई तालिम दिएकी थिइन् ।
समापन कार्यक्रममा प्रमुख अतिथि झापा गाउँपालिका कार्यवाहक अध्यक्ष थपलिया , कार्यवाहक वडाध्यक्ष हेमा राई , शिक्षक महासंघका झापा गाउँपालिका अध्यक्ष जगन्नाथ राजवंशी , सहप्रधानाध्यापकहरु टिकाप्रसाद कट्टेल र रोहितकुमार पोद्धार , शिक्षक तुलाराम वस्नेत , वडा सदस्य सोम प्रसाई र विद्यार्थीहरुको उपस्थिति रहेको थियो ।
