बिर्तामोड, साउन १५ । निर्माणाधीन अवस्थामा रहेको पूर्वपश्चिम लोकमार्गको काँकरभिट्टा–लौकही सडकआयोजनाअन्तर्गत बिर्तामोड नगरपालिका क्षेत्रको सडकमा पर्ने नागरिकहरुलाई एचआईभी÷एड्स, यौन रोग र मानव बेचबिखनसम्बन्धी सचेतना प्रदान गरिएको छ ।
बिहीवार नगरपालिकाको सभाहलमा भौतिक पूर्वाधार तथा यातायात मन्त्रालय र एशियाली विकास बैंक (एडीबी) को आर्थिक सहयोगमा राजमार्ग अभिवृद्वि आयोजनाअन्तरगत काँकरभिट्टा–लौकही सडकको बिर्तामोडमा लैङ्गिक समानता तथा सामाजिक समावेशीकरण (एचआईभी÷एड्स, यौन रोग र मानव बेचबिखन) सम्बन्धी सचेतना गराइएको हो ।
बिर्तामोड नगरपालिका –१, २, ३, ४, ५ र ६ नम्बर वडाको सडकमा जोडिएर बसोबास गर्ने महिला तथा पुरुषहरुलाई एचआईभी÷एड्स, यौन रोग र मानव बेचबिखनको जोखिम हुन सक्ने भएकाले सचेतना कार्यक्रम आयोजना गरिएको काँकरभिट्टा–लौकही सडक योजनाअन्तर्गत लैंगिक समानता तथा सामाजिक समावेशीकरण विज्ञ जीवन सिंहले जानकारी दिइन् ।
कार्यक्रममा एचआईभी÷एड्स र यौनजन्य सङ्क्रमणसम्बन्धी सामाजिक अभियन्ताहरु दीपा चौधरीले, यौन हिंसासम्बन्धी सीता राना र मानव बेचबिखनसम्बन्धी इलाका प्रहरी कार्यालय बिर्तामोडका प्रहरी सहायक निरीक्षक प्रदिप आले मगरले प्रोजेक्टरमार्फत जानकारी गराएका थिए ।
निर्माणाधीन अवस्थामा रहेको सडकमा बाहिरबाट काम गर्न आएका व्यक्तिहरुबाट बालबालिका तथा महिलामाथि हुने यौनजन्य हिंसाका क्रियाकलाप, दुर्व्यवहारलगायतका गतिविधिलाई रोक्न समुदायलाई सचेत गराइएको विज्ञ सिंहको भनाई छ ।
कार्यक्रमका प्रमुख अतिथि बिर्तामोड नगरपालिकाकी प्रमुख पवित्रा महतारा प्रसाईंले सडक बनाउन विभिन्न देशबाट कामदारहरु यहाँ आएको बताइन्। उनीहरुबाट हुनसक्ने जोखिमबाट बच्न नगरबासीहरु सचेत हुनु पर्ने र आयोजना हेर्नेले पनि गम्भीर भएर ध्यान दिनु पर्नेमा जोड दिइन् । साथै कार्यक्रमका सहभागीलाई यस कार्यक्रमबाट आफूले सिकेको कुरा समुदायका अरु मानिसहरुलाई पनि सिकाउन अनुरोध गरिन् ।
कार्यक्रममा काँकरभिट्टा–लौकही योजना कार्यालयका इन्जिनियर आश्रय महत, बिर्तामोड नगरपालिकाका उपप्रमुख नगेन्द्र संग्रौला , विभिन्न सामाजिक संघ–संस्थाका प्रतिनिधि, सडकसँग जोडिएका वडाका नागरिकहरु गरी १५० भन्दा माथिको सहभागिता रहेको थियो ।
काँकरभिट्टा–लौकही सडक आयोजनाअन्तर्गत झापा, मोरङ र सुनसरी जिल्लाका सडक क्षेत्रमा पर्ने विभिन्न पालिकामा एचआईभी÷एड्स, यौन रोग र मानव बेचबिखन) सम्बन्धी सचेतना कार्यक्रम भइरहेको छ । सचेतना कार्यक्रमको औचित्यमाथि प्रकाश पार्दै विज्ञ सिंहले सहजीकरण गरेकी थिइन् ।
