झापा, साउन १६ । फेसबुकको विषयलाई लिएर बिर्तामोड नगरपालिकाका दुई जनप्रतिनधिबीच उत्पन्न विवादलाई राजनीतिकरण गर्न खोजेपछि सल्टिनुका साटो अझ बढ्दै गएको छ ।
निष्पक्ष भएर विवादलाई निरुपण गर्नुको साटो नगर उपप्रमुख नगेन्द्र संग्रौला र वडाध्यक्ष अजय कार्की वीचको विवादमा राजनीतिक दलहरु पक्ष विपक्षमा लागेपछि विवाद मिल्न नसकेको हो ।
उपप्रमुख संग्रौलाआवद्ध नेकपा एमालेले वडाध्यक्ष कार्कीलाई कार्वाही गर्नुपर्ने माग गरिरहँदा कार्कीआवद्ध राप्रपासहित नेकपा माओवादी केन्द्र र राष्ट्रिय स्वतन्त्र पार्टीले चाहिँ उपप्रमुख संग्रौलालाई कार्वाही गर्नुपर्ने मागसहित आन्दोलित भएका छन् ।
आज वडाध्यक्ष कार्कीसहित राप्रपा झापाले बिरोध जनाउँदै बिर्तामोड नगरपालिकाको कार्यालयमा धर्ना तथा बिरोध कार्यक्रम गर्ने बुझिएको छ । बिर्ताबजारको दुर्गामन्दिरमा भेला भएर दिउँसो नगरपालिका कार्यालय जाने कार्यक्रम रहेको बताइएको छ ।
दुवैबीचको विवादलाई लिएर हिजो बिर्तामोड नगरपालिकाको कार्यपालिका बैठक बसेको थियो । सो बैठकमा वडाध्यक्ष कार्की अनुपस्थित रहेका थिए । पछि नगरपालिकाले प्रेस विज्ञप्ति जारी गरी आफ्नो धारणा सार्वजनिक गरेको थियो । निष्पक्षरुपमा सो विज्ञप्ति नआएको भन्दै वडाध्यक्ष कार्कीले आन्दोलन गर्न छोडेका छैनन् । उपप्रमुख संग्रौलाले फेसबुकमा आफ्नो बारेमा नकारात्मक टिप्पणी गरेको भन्दै वडाध्यक्ष कार्कीले बुधवार उपप्रमुखको कार्यकक्षमा हुलहुज्जत गरेका थिए ।
