झापा, साउन २१ । झापाको गौरादहमा मोटरसाइकलले पैदलयात्रीलाई ठक्कर दिँदा चारजना घाइते भएका छन् ।
गएराति ८.३० बजे गौरादह नगरपालिका २ ताजपुरिया टोलस्थित गौरादह गौरीगञ्ज सडकखण्डमा गौरीगञ्जबाट गौरादहतर्फ आउँदै गरेको प्र. १–०१–०१३ प ६६६९ नम्बरको मोटरसाइकलले पैदलयात्रीहरुलाई ठक्कर दिएको थियो । पैदलयात्रीहरु बारा सिमरनगर नगरपालिका वडा नं ७ स्थायी वतन भई हाल गौरादह २ बस्ने २२ वर्षीय निरन्जन राम र लम्जुङ सुन्दर बजार गाउँपालिका १ स्थायी वतन भई हाल गौरादह २ बस्ने २२ वर्षीय रोहित बिश्वकर्मा घाइते भएका छन् ।
त्यस्तै मोटरसाइकल चालक कमल गाउँपालिका ६ बस्ने ५२ वर्षीय पन्चलाल राजवंशी र सोही मोटरसाइकलमा पछाडी सवार गौरादह २ बस्ने ५८ वर्षीय यादव राजवंशीसमेत घाइते भएका छन् । चारै जना घाइतेको मेडिम्याक्स अस्पताल गौरादहमा उपचार भइरहेकोमा पन्चलाल राजवंशी र निरन्जन रामलाई थप उपचारको लागि न्युरो बिराटनगर रेफर गरिएको प्रहरीले जनाएको छ ।
