दमक, साउन २४ । झापाको कमल गाउँपालिकामा निर्माणाधीन आदिवासी रंगशालालाई राज्यले उपेक्षा गरेको भन्दै सरोकारवालाहरुले अव जनस्तरबाट रंगशाला निर्माणमा जुट्ने प्रतिवद्धता जनाएका छन् ।
आदिवासी रंगशाला तथा स्मृति प्रतिष्ठानले शनिवार रंगशालाका सन्दर्भमा गरेको अन्तरकृयामा उनीहरुले राज्यको विभेदकै कारण आदिवासी रंगशाला निर्माण हुन नसकेको र अव भने जनस्तरबाट निर्माणको काम शुरु गरिनु पर्नेमा जोड दिए ।
रंगशाला समितिका अध्यक्षसमेत रहेका कमल गाउँपालिका अध्यक्ष हुकुमसिंह राईले आदिवासी जनजातिहरुको चिहानमाथि राजनीति चलखेल गरिँदा रंगशालाले गति पाउन नसकेको उल्लेख गरे ।
पितापुर्खाको चिहान नष्ट गरेर आदिवासीको नाममा नै रंगशाला बनाउने भनिएपनि पछिल्ला वर्ष नेकपा एमालेका अध्यक्ष तथा प्रधानमन्त्री केपी शर्मा ओलीकै कारण रंगशालाको नाममा गिजो हालेको भन्दैं उनले अव भने जनता यो विभेदको विरुद्ध उत्रिन बाध्य हुने चेतावनी दिए । उनले भने, –‘अव जनताकै सहभागितामा रंगशाला निर्माणको अभियानमा जुट्ने छौं । स्वदेश तथा विदेशका सवै नेपालीहरु,खेलप्रेमी,शुभचिन्तकहरुको सहयोगबाट रंगशाला बनाई छाड्छौं ।’
अन्तरक्रियामा नेपाली कांग्रेसका पूर्व आमन्त्रित केन्द्रीय सदस्य दिलीप राईले आदिवासी रंगशाला राज्यकै कारण चपेटामा परेको र राज्यको सहयोगबाट निर्माण हुने अवस्था नरहेकाले अव जनस्तरबाट निर्माण गर्न लाग्नुपर्ने उल्लेख गरे ।
किरात राई यायोक्खा कोशी प्रदेश समितिका अध्यक्ष पारसमणि राईले राज्यको उपेक्षामा परेको यस आदिवासी रंगशाला हाम्रा लागि पहिचानकै मुद्धा भएकाले यो अभियान देशविदेशसम्म पुर्याएर निर्माणमा लाग्नुपर्ने औल्याए ।
कमल ५ स्थित नेपाल रेडक्रस सोसाइटी लखनपुर उपशाखाको सभाहलमा आयोजित अन्तरक्रिया कार्यक्रममा कमल गाउँपालिका ५ की वडा सदस्य चन्द्रकला सुब्बा, यायोक्खा झापाका पूर्व अध्यक्ष इन्द्रमान चाम्लिङले आदिवासी जनजातिको स्मृतिमा निर्माण थालिएको यस रंगशाला बनाउन सवै लागे संभव हुने भएकाले त्यसमा सवैको सहयोग आवश्यक भएको बताए ।
कार्यक्रममा माओवादी केन्द्र कमलका अध्यक्ष रविन गुरुङ, लोकतान्त्रिक खेलकुद संघ झापाका सचिव रोशन दाहाल, किरात राई यायोक्खा कमलका पूर्व अध्यक्ष सन्तोष राई, सगुन युवा क्लवका अध्यक्ष देवेन्द्र आङदेम्बे,दमक तेक्वान्दो डोजाङका अध्यक्ष जितु धिमाल, महिला नेतृ विष्णुमाया भट्टराईलगायतले आदिवासी रंगशाला बनाउन जनस्तरबाट अभियान थाल्न ढिलाई गर्न नहुने विचार राखेका थिए ।
अन्तरक्रियासहितको बैठकले रंगशाला निर्माणमा राज्यले गरेको विभेदका विरुद्ध धन्यवाद र रंगशाला निर्माण सम्बन्धमा जातीय संघ संस्था, खेलकुदजन्य क्लव,चिहान परिवार लगायतका सरोकारवालाहरुसंग अन्तरक्रिया गर्ने निर्णय गरेको महासचिव दिपेनवाला राईले बताए । रंगशाला निर्माणमा संघीय तथा प्रदेश सरकारले आवश्यक वजेट बिनियोजन नगर्दा रंगशाला निर्माण कार्य अलपत्र बन्न पुगेको हो ।
