झापा, साउन ३० । शिक्षासेवी गुरुभक्त न्यौपानेको निधनलाई लिएर बिर्तामोडका सम्पूर्ण विद्यालयहरुमा आज शोक विदा दिइएको छ ।
नगर शिक्षा समितिका निवर्तमान सदस्य तथा कंचनजंघा अंग्रेजी माविका संस्थापक प्राचार्य न्यौपानेले शिक्षा क्षेत्रमा सक्रिय योगदान पुर्याएकाले आज नगरभरिका सम्पूर्ण सामुदायिक , संस्थागत , धार्मिक तथा पूर्व प्राथमिक विद्यालयहरुलाई शोक विदा दिने निर्णय गरिएको नगर शिक्षा अधिकारी तिलचन भण्डारीले सूचना जारी गरी जनाएका छन् ।
न्यौपानेको ६६ वर्षको उमेरमा आज बिहान ७.४० बजे निधन भएको हो ।उनी केही समयदेखि अस्वस्थ रहेका थिए । बीएण्डसी अस्पतालमा भर्ना गरिएका न्यौपानेलाई हिजो घर ल्याइएको थियो । विभिन्न शिक्षण संस्थामा अध्यापन गरेका न्यौपानेले शैक्षिक क्षेत्रमा ठूलो योगदान दिएका छन् ।
उनी दुर्गा माध्यमिक विद्यालयका प्रधानाध्यापक र विराट ज्योति अंग्रेजी माविका संस्थापक अध्यक्षसमेत रहेका थिए । उनले जिल्लाका विभिन्न विद्यालयमा छात्रवृतिका लागि अक्षय कोष स्थापना गरिदिएका थिए ।
