झापा, साउन ३१ । झापाको कचनकवल–६, बनियानी बजारमा तरकारी बेच्न आउने साना किसानहरूसंग अवैध रूपमा सब्जी असुल्ने गरिएको तथ्य फेला परेको छ।
हप्तामा दुई दिन, सोमबार र शुक्रबार, हटिया लाग्ने यस बजारमा प्रायः स्थानीय साना किसानहरू आफ्नै वारीमा उत्पादन गरेको तरकारी बेच्न आउँछन्। साथै भारतबाट पनि केही किसानहरू तरकारी बिक्रीका लागि आउँछन्।
पीडित किसानहरूका अनुसार बजारमै घर भएका केही व्यक्तिहरूले बाहिरबाट आएका किसानलाई “बजारमा बस्ने भए सब्जी निःशुल्क दिनुपर्छ” भन्ने दबाब दिने गरेका छन्। सब्जी दिन अस्वीकार गरे अर्को दिन बजारको सडकमा बस्न नदिने चेतावनी दिने गरिएको उनीहरूको भनाई छ। एक किसानले आफ्नो नाम गोप्य राख्ने सर्तमा भने, “नदिए बजारको सडकमा बस्न पाउने ग्यारेन्टी छैन, त्यसैले बाध्य भएर दिनुपर्छ।”
बनियानी बजार कृषि बजारको रूपमा दर्ता गरिएको छ। यहाँ तरकारी बेच्ने किसानहरूले दैनिक “बटी” को रूपमा स्थानीय सरकारलाई कर तिरेका हुन्छन्। तर कर तिरेर पनि “दादा भत्ता” का नाममा सब्जी दिनुपर्ने बाध्यता रहेको उनीहरूको गुनासो छ।
२०२१ सालतिर समला मरल राजवंशीले आफ्नै जग्गामा बनियानी बजार सुरु गरेका थिए। ‘समला मरलेर हाट’का रुपमा प्रख्यात त्यतिबेला बिक्री नभएका सामान समेत उनले किसानबाट किनिदिने गरेको स्थानीयहरू स्मरण गर्छन्। तर अहिलेको अवस्थाले किसानहरूलाई आर्थिक र मानसिक दुवै रूपमा दबाबमा पारेको उनीहरूको भनाइ छ।
