झापा, भदौ ९ । तमोर नदीमा टिपर खस्दा चालक बेपत्ता भएका छन् ।
ताप्लेजुङ फक्ताङलुङ –६ लेलेपस्थित तमोर करिडोर सडकखण्डमा तमोर खोला–५ हाइड्रोपावरको ग १ क ६३१८ नम्बरको टिपर बिग्रिएको थियो ।
आज दिउँसो १.४० बजे सोही हाइड्रो पावरमा मेकानिकका रुपमा काम गर्ने तनहुँ सुक्ला गण्डकी गाउँपालिका –४ बस्ने २४ वर्षीय सुदिप सुबेदीले टिपर मर्मत गरी चेक गर्ने क्रममा अचानक टिपर सडकदेखि करिब २५ मिटर तल तमोर नदीमा खसेर दुर्घटना भएको हो । टिपर नदीको विचमा पुगेको छ भने मेकानिक सुवेदी बेपत्ता भएका हुन् ।
रणशार्दुल गणको सुरक्षा पोष्ट लेलेपबाट १० जना, प्रहरी चौकी लुङधुङबाट ३ जना र सशस्त्र प्रहरी बल, नेपाल अपर तमोर जलविद्युत आयोजना सुरक्षा बेस ठौवाबाट ७ जनाको टोली खटिएर फक्तालुङ –३, शिवास्थित तमोर नदीको किनारमा खोजतलास भइरहेको प्रहरीले जनाएको छ ।
