झापा, कात्तिक २ । आगामी निर्वाचनमा झापाका अपायक मतदान स्थल सार्न जिल्ला निर्वाचन कार्यालयसंग आग्रह गरिएको छ ।
जिल्ला निर्वाचन कार्यालय झापाको आयोजना तथा प्रमुख जिल्ला अधिकारी गोपालकुमार अधिकारीको संयोजनमा आज राजनीतिक दलका प्रतिनिधि , जनप्रतिनिधि र सुरक्षा निकायका प्रमुखहरुसंग जिल्ला प्रशासन कार्यालयमा छलफल भएको थियो । छलफलमा राजनीतिक दलका प्रतिनिधि र जनप्रतिनिधिहरुले जिल्लाका केही अपायक मतदान स्थल सार्न आग्रह गरेका हुन् ।
मेचीनगर १० को प्राथमिक स्वास्थ्य केन्द्र धुलावारीमा रहेको मतदान स्थललाई १० नं वडा कार्यालयमा सार्नुपर्ने आग्रह गरिएको थियो । त्यस्तै गौरादह ६ का केही मतदाताहरुलाई अपायक पर्ने ठाउँमा मतदान स्थल रहेको भन्दै त्यहाँका वडाध्यक्षले पायक ठाउँमा सार्न आग्रह गरेका थिए ।
आ–आफ्ना पालिका र वडामा रहेका मतदान स्थलहरुको अनुगमन गरिदिन जनप्रतिनिधिहरुले आग्रह गरेका थिए । यही कात्तिक १२ गतेदेखि जिल्लाका मतदान स्थलहरुको अनुगमन गर्ने कार्यक्रम रहेको जिल्ला निर्वाचन अधिकारी तुलसी नेपालले बताए । जिल्लामा २८५ वटा मतदान स्थल रहेका छन् ।
आजको छलफलमा नेपाली कांग्रेस , नेकपा एमालेसहित ११ वटा राजनीतिक दलका प्रतिनिधिहरुको उपस्थिति रहेको थियो । त्यस्तै गौरीगञ्ज गाउँपालिकाकी अध्यक्ष फूलवती राजवंशीसहित विभिन्न पालिकाका वडाध्यक्षहरु उपस्थित रहेका थिए ।
