झापा, कात्तिक १८ । मोरङ र सुनसरीमा भएका सवारी दुर्घटनाका घाइते दुईजनाको मृत्यु भएको छ ।
गत असोज ३० गते विहानको राति १२.०५ बजे मोरङ बिराटनगर– १० स्वागतम होटल छेउस्थित कोशी लोकमार्गमा रोडशेषबाट रानीतर्फ जाँदै गरेको प्र१–०४–००२प०२३१ नं. को स्कुटर अनियन्त्रित भई दुर्घटना हुँदा स्कुटर चालक बिराटनगर बस्ने बर्ष १८ का निखिल साह , स्कुटरमा पछाडी सवार विराटनगर १५ बस्ने २५ वर्षीय विकास चौधरी र विराटनगर १ बस्ने १८ वर्षीय समिर शर्मा घाइते भएका थिए ।
तीनै जना घाइतेहरुको न्युरो अस्पताल बिराटनगरमा उपचार भइरहेकोमा स्कुटर चालक निखिल साहको आज बिहान ४;३५ बजे उपचारको क्रममा मृत्यु भएको हो ।
त्यस्तै सुनसरीमा दुई साताअघि मोटरसाइकलको ठक्करबाट घाइते भएका पैदलयात्रीको मृत्यु भएको छ । कात्तिक ४ गते साँझ ६ बजे इनरुवा ७ बर्छवास्थित इनरुवा–दुहबी सडकखण्डमा को२१प ८२९० नम्बरको मोटरसाइकलले पैदलयात्री सोही ठाउँ बस्ने ४० वर्षीया बेचनीदेवी साहलाई ठक्कर दिएको थियो ।
घाइतेलाई नोवेल अस्पताल विराटनगरमा उपचार गराइएको थियो । गएराति ८;५२ बजे डाक्टरको सल्लाह अनुसार घाइतेलाई घर लगेकोमा राति १२ बजे मृत्यु भएको प्रहरीले जनाएको छ ।
मोटरसाइकल चालक सुनसरी गढी २ औरावनी बस्ने बर्ष २२ का मनिषकुमार यादवलाई प्रहरीले नियन्त्रणमा लिएको छ ।
