झापा, मंसिर १२ । राष्ट्र, राष्ट्रियता, धर्म–संस्कृति तथा नागरिक बचाउ महाअभियान नेपालका केन्द्रीय संयोजक दुर्गा प्रसाईंले आफ्ना नेता कार्यकर्तामाथि गरिएको कार्वाहीमा त्रुटि भएको बताएका छन् ।
उनले अभियानका मेची अञ्चल सह–संयोजक प्रकाशचन्द्र उप्रेती र केन्द्रीय सचिवालय सदस्य ओमप्रकाश लुइटेलमाथि गरिएको कार्वाहीमा त्रुटि भएको स्वीकार गर्दै त्यसलाई सच्याउने बताएका छन् । प्रतिदिनसंग कुरा गर्दै उनले युवा विद्यार्थी तथा खेलकुद विभाग प्रमुख विष्णुजंग बस्नेत र नागरिक प्रतिरक्षा बल नेपालका सह–संयोजक गोपाल बोहोरालाई निष्कासनको कार्वाही गर्दै गर्दा उप्रेती र लुइटेलको नाम पनि पर्न गएको स्पष्ट पारेका हुन् ।
अभियानका संगठन विभाग प्रमुख प्रेम थापा र सचिव प्रेमदिप थाम्सुहाङ लिम्बूले तीन दिनअघि एक पत्र सार्वजनिक गर्दै कुनै पनि पदमा नरहने गरी युवा विद्यार्थी तथा खेलकुद विभाग प्रमुख विष्णुजंग बस्नेत र नागरिक प्रतिरक्षा बल नेपालका सह–संयोजक गोपाल बोहोरालाई निष्कासन तथा मेची अञ्चल सह–संयोजक प्रकाशचन्द्र उप्रेती र केन्द्रीय सचिवालय सदस्य ओमप्रकाश लुइटेललाई निलम्बन गरिएको जनाएका थिए ।
अभियानबाट निलम्बित उप्रेती र लुइटेल तथा अन्य पदाधिकारीहरुले समेत केन्द्रीय समितिको बैठकको निर्णयबिना सामाजिक सञ्जालमार्फत थापा र लिम्बूले जारी गरेको पत्रप्रति गम्भीर आपत्ति जनाएका छन् ।
उनीहरुले आज बिर्तामोडमा पत्रकार सम्मेलन गर्दै उक्त आरोप आधारहीन, एकपक्षीय र चरित्रहत्या गर्ने प्रकृतिको भएको दाबी गरेका छन्।
अभियानको विधानअनुसार कुनै पनि आन्तरिक कारबाही अघि बढाउँदा सुनुवाइ, स्पष्टीकरण र केन्द्रीय निर्णय अनिवार्य हुनु पर्ने भन्दै उनीहरूले प्रकाशित पत्र पूर्णतः विधि–विपरीत र संगठन–विपरीत रहेको बताए।
उनीहरूले सामाजिक सञ्जालमार्फत अभियानको नाम, लेटरहेड र फोटो दुरुपयोग गरी असत्य एवं भ्रमपूर्ण सूचना प्रवाह गरिएको दावी गरेका छन्। यस्ता गतिविधिले संगठनको प्रतिष्ठा, संरचना र एकता कमजोर पार्ने चेतावनीसमेत उनीहरूले दिएका छन्।
उनीहरुद्वारा जारी विज्ञप्तिमा तत्काल गल्ती स्वीकार गरी संगठनभित्र आवश्यक समन्वय र स्पष्टीकरण दिनुपर्ने माग गरेका छन् । अन्यथा, पदको दुरुपयोग गरी अन्तरविरोध सिर्जना गर्ने व्यक्तिमाथि नियमअनुसार कारबाही गर्नुपर्ने मागसमेत गरेका छन्।
विज्ञप्तिमा शेरबहादुर थापा (केन्द्रीय सदस्य), माधव कल्पित, हरि सिटौला (केन्द्रीय सदस्य), प्रकाशचन्द्र उप्रेती (केन्द्रीय सदस्य), ओमप्रकाश लुइटेल (केन्द्रीय सदस्य), दिपेश प्रसाई (केन्द्रीय सदस्य), उमाकान्त अधिकारी (केन्द्रीय सदस्य), डिआर कडरिया (केन्द्रीय सदस्य), रामचन्द्र मैनाली (स्थानीय, झापा जिल्ला अध्यक्ष), राजेश राजवंशी (झापा जिल्ला अध्यक्ष), रामकुमार नेपाल (झापा जिल्ला वरिष्ठ उपाध्यक्ष), कमल कर्माचार्य (उपाध्यक्ष, झापा) र लक्ष्मी राजवंशी (उपाध्यक्ष, झापा)को नाम उल्लेख छ ।
यसैबीच नागरिक बचाउ दल नेपालको सभापतिको जिम्मेवारीमा पुगेपछि अभियानको केन्द्रीय प्रवक्ताबाट राजीनामा दिएका माधव कल्पितले हिजो भुलवस भएका गल्तीबाट पाठ सिकेर अघि बढ्न सबैलाई हार्दिक अपिल गरेका छन् ।
