झापा, मंसिर १४ । धनकुटामा शैक्षिक भ्रमणको बस दुर्घटना हुँदा २४ विद्यार्थीसहित २९ जना घाइते भएका छन् ।
आज साँझ ४.२५ बजे धनकुटा नगरपालिका वडा नम्बर ७ रमाइलो घुम्तीस्थित कोशी लोकमार्गमा तेह्रथुमबाट धरानतर्फ आउँदै गरेको सुनसरी रामधुनी नगरपालिका वडा नम्बर ५ स्थित पिंक लोटस इङ्लिस बोर्डिङ स्कुलको शैक्षिक भ्रमणबाट फर्किदै गरेको को १ ख ५३१३ नम्बरको स्कुल बस अनियन्त्रित भई दुर्घटना भएको हो ।
उक्त बसमा ३६ जना विद्यार्थी,३ जना शिक्षक र २ जना चालक दलका सदस्य गरी ४१ जना सवार रहेका थिए । त्यसमध्ये २४ जना विद्यार्थीसहित २९ जना घाइतेलाई तत्काल उद्धार गरी जिल्ला अस्पताल धनकुटामा लगी उपचार भइरहेको जिल्ला प्रहरी कार्यालयले जनाएको छ ।
