झापा, पुष २९ । विघटित प्रतिनिधिसभाका सभामुख देवराज घिमिरेले आफ्नो तीन वर्षे कार्यकालमा भए–गरेका कामको विवरण प्रस्तुत गरेका छन् ।
निर्वाचनका लागि मनोनयन दाखिला गर्ने अघिल्लो दिन आगामी माघ ५ गते कार्यकाल सकिन लागेका सभामुख घिमिरेले आज बिर्तामोड नगरपालिकामा अन्तरक्रिया कार्यक्रम गरी आफूले गरेका कामको विवरण सार्वजनिक गरेका हुन् । झापा निर्वाचन क्षेत्र नं २ का निवर्तमान सांसदसमेत रहेका घिमिरेले आफ्नो ३ वर्षे अवधिमा यस निर्वाचन क्षेत्रमा कुल ३२३ वटा योजनाहरु संघीय सरकारमार्फत पार्न सफल भएका छन् । जसमध्ये पहिलो वर्ष आर्थिक वर्ष ०८०/८१ मा ११२ वटा ८१/८२ मा १२१ वटा र ८२/८३ मा ९० वटा योजनाहरु परेका छन् ।
बजेटका आधारमा ३ वर्षमा ५ अर्व ४९ करोड ९३ लाख रुपैयाँ परेको छ। जसमध्ये आ.व. ०८०/८१ मा ७२ करोड, ८१/८२ मा २ अर्व ३४ करोड र ८२/८३ मा २ अर्व ४३ करोड परेको छ। बजेट परेपनि गत २ आ.व.को अवस्था हेर्दा ठेक्का ननिस्कने, निस्केको पनि कम मूल्यमा विडिङ हुने र त्यसमा पनि निर्धारित समयमा सम्पन्न नगर्दा बजेट फ्रिज हुने आदि कारणले समग्रमा ५० प्रतिशत बजेट मात्र खर्च भएको उनले जानकारी दिएका छन् ।
अन्तरक्रिया कार्यक्रममा सभामुख घिमिरेले प्रस्तुत गरेको कामको विवरण यसप्रकार रहेको छ ।
उपस्थित नगरप्रमुखहरु, गाउँपालिका अध्यक्षज्यू, विभिन्न राजनैतिक दलका केन्द्रदेखि स्थानीय तहसम्मका नेतागण, विभिन्न मिडियासंग आवद्ध पत्रकार मित्रहरु एवम् उपस्थित दिदीबहिनी तथा दाजुभाइहरु,
सर्वप्रथम मेरो निमन्त्रणालाई स्वीकार गरेर उपस्थित भइदिनु भएकोमा हार्दिक धन्यवाद दिन चाहन्छु र मेरो ३ वर्षे कार्यकालमा भए–गरेका काम कार्वाहीहरुको विवरण प्रस्तुत गर्न चाहन्छु।
१. २०७९ साल मंसीर ४ गतेको आम निर्वाचनबाट प्रतिनिधिसभा सदस्यमा निर्वाचित भई पौष ८ गते सपथ ग्रहण गरेपछि औपचारिक रुपमा जिम्मेवारी बहन गरें ।
२. तत्कालीन समयमा भएको राजनैतिक परिवेशले २०७९ माघ ५ गते व्यवस्थापिकाको सर्वोच्च पद (सभामुख) पदमा निर्वाचित भएँ ।
३. प्रतिनिधिसभामा राजनैतिक दलहरुको प्रतिनिधित्वले एकदलको स्थायी सरकार दिनसक्ने अवस्था थिएन । त्यसैले छोटो–छोटो समयमा सरकार परिवर्तन भइनै रहे। मेरो सभामुखको कार्यकाल आगामी माघ ५ गते ३ वर्ष पुरा हुनेछ । यति छोटो अवधिमा मैले ५ वटा फरक–फरक सरकारसंग काम गर्नुपरेको यथार्थ तपाईहरुसमक्ष राख्दा मलाई खुशी लागेको छैन ।
४. गत भाद्र २३ र २४ गते भएको आन्दोलन र विध्वंसले देशको मानवीयसंगै खरबौको सरकारी एवम् निजी भौतिक संरचना मात्र ध्वस्त भएन, व्यवस्थापिका, कार्यपालिका, न्यायपालिकासमेत ध्वस्त भयो। योसंगै देशको संविधान नै लिकभन्दा बाहिर गयो ।
५. यो विषम परिस्थितिमा संविधानलाई लिकमा चढाएर हिडाउनु हामी सबैको दायित्व हो। यसका लागि २ वटा विकल्पहरु अहिले हाम्रो सामुमा देखिएका छन् । पहिलो संसद पुनर्स्थापना गरेर तत्कालीन आन्दोलनकारीका जायज मागहरु कानुन संशोधनमार्फत पुरा गर्दै निर्वाचनमा जाने र दोस्रो अहिले नै निर्वाचनमा जाने र नयाँ जनादेश लिने। यी २ मध्ये पहिलो विकल्प उपयुक्त हो भन्ने ठानेको छु। र यो विषय अहिले सर्वोच्च अदालतमा विचाराधीन रहेकोले थप केही भन्न त चाहन्न । तथापि छिटो फैसला होस् भन्ने अपेक्षा राख्दछु ।
६. अहिले सरकारले निर्वाचन गराउन कार्यतालिका सार्वजनिक गरिसकेको अवस्थामा निर्वाचन हुन्छ– हुन्न भन्ने अन्योलका वीचमा पनि यसको तालिका अनुसार तयारी गर्दै जानु नै पर्ने हुन्छ । त्यसैले कार्यतालिका र कानुन अनुसार सभामुखको कार्यकाल आगामी माघ ५ गते (अर्को निर्वाचनका लागि मनोनयन दाखिला गर्ने अघिल्लो दिन) सकिदैछ । यदि चुनाव भएन भने के हुन्छ भन्ने बारेमा आ–आफ्नै तर्कहरु छन् । कानुनमा स्पष्ट उल्लेख छैन ।
७. वर्तमान अवस्था र विद्यमान कानुनका आधारमा मेरो कार्यकाल सकिने चरणमा रहेको हुनाले मलाई ५ वर्षका लागि निर्वाचित गर्नुहुने मेरा मतदाताहरुमाझ ३ वर्षमा मैले के के गरें, के के योजनाहरु अधुरा रहे भन्ने वारेमा स्पष्ट गर्नुपर्छ भन्ने महसुस गरेर यो कार्यक्रम आयोजना गरेको छु।
८. मैले यो क्षेत्रमा नेकपा एमालेको तर्फवाट निर्वाचन लडेको हुँ र तत्कालीन अवस्थामा ५ वटा मुख्य विषयगत क्षेत्रभित्र २५ वटा उपक्षेत्र र १०८ विशेष कार्यक्रमहरु समावेश गरी “हाम्रा १०८ संकल्प” नामक प्रतिवद्धतापत्र सार्वजनिक गरेका थियौ।
९. त्यसै परिधिभित्र रहेर वा तत्कालीन आवश्यकताका आधारमा हामीले सक्दो प्रयास गरेका छौ। विकास निर्माणसंग प्रत्यक्ष सरोकार रहने कार्यकारी पद हैन सभामुख, त्यसैले मन्त्री, सचिव लगायत मन्त्रालयका विभिन्न महाशाखासंग प्रत्यक्ष परोक्ष रुपमा सम्पर्क गरेर कार्यक्रमहरु संचालन गर्नु पर्ने अवस्था थियो।
१०. सरकार फेरिने, मन्त्री फेरिने, सचिव फेरिने, महाशाखा प्रमुखहरु फेरिने प्रकृया यति छिटो छिटो भयो कि कुरा गर्दा एउटा सचिव, फाइल पेश गर्दा अर्को, योजना फाइनल हुने वेलामा अर्को र कार्यान्वयनका वेला अर्को हुने अवस्था समेत आयो। तथापि हामीले गर्ने प्रयास उच्च गरेका छौ भन्ने विश्वास लिएको छु ।
११. मेरो ३ वर्षे अवधिमा यो निर्वाचन क्षेत्रमा कुल ३२३ वटा योजनाहरु संघीय सरकारमार्फत परेका छन् । जसमध्ये पहिलो वर्ष आव ०८०/८१ मा ११२ वटा ८१/८२ मा १२१ वटा र ८२/८३ मा ९० वटा योजनाहरु परेका छन् ।
१२. बजेटका आधारमा ३ वर्षमा ५ अर्व ४९ करोड ९३ लाख रुपैयाँ परेको छ। जसमध्ये आव ०८०/८१ मा ७२ करोड, ८१/८२ मा २ अर्व ३४ करोड र ८२/८३ मा २ अर्व ४३ करोड परेको छ। बजेट परेपनि गत २ आ.व.को अवस्था हेर्दा ठेक्का ननिस्कने, निस्केको पनि कम मूल्यमा विडिङ हुने र त्यसमा पनि निर्धारित समयमा सम्पन्न नगर्दा बजेट फ्रिज हुने आदि कारणले समग्रमा ५० प्रतिशत बजेट मात्र खर्च भएको देखिएको छ। आव ०८२/८३ का कतिपय योजनाहरु पछिल्लो सरकारले रोक्का गरेको, कटौती गरेको अवस्था छ त्यसको अद्यावधिक विवरण आएको छैन। हरेक दिन कुनै न कुनै योजनालाई अगाडी वढाउन निरन्तर पहल गरिएको छ।
१३. मैले २०७९ मंसीरको चुनाव अगाडी नै यो क्षेत्रमा हिड्दा कन्काई ९ को घैलाडुब्बा– चम्पापुर जोड्ने विरिङ खोलामा पक्की पुलको आवश्यकतालाई महसुस गरेको थिएँ । त्यसलाई हामीले चुनावी प्रतिवद्धतामा समेत राखेका थियौ र २ वर्षको अथक प्रयासले अहिले ठेक्का लागेर काम सुरुवात भएको देख्दा खुशी लागेको छ । तथापि कामको गति ढिलो भएकोले जतिसक्दो चाँडो काम गर्न सम्वन्धित पक्षको ध्यानाकर्षण गराउँदछु ।
१४. यो क्षेत्रमा ठुला तथा साना खोलाहरु प्रशस्त रहेको हुनाले पुलको आवश्यकता हुने नै भयो। तर एउटा पुल बनाउन करोडौ रुपैयाँ लाग्ने र समय पनि धेरै लाग्ने भएकोले बजेट स्वीकृत गराउन अत्यन्तै कठीन हुने हँुदा अपेक्षित समयमा योजनाहरु पार्न नसकिएको स्वीकार गर्दछु। गत सालको वाढीले बगाएको शनिश्चरे– खुदुनावारी सडकको पुलका लागि बजेट विनियोजन गराउन सवै शक्ति प्रयोग गर्दा पनि यो आ.व.को रातो कितावमा निकाल्न प्राविधिक हिसावले सकिएको थिएन । तर अहिले विपद व्यवस्थापनअन्तर्गत ३५ करोड रकम स्वीकृत भई ठेक्का लाग्ने तयारीमा रहेको छ । यसमा लागिपर्ने नगरप्रमुख, नेकपा एमाले ,नेपाली कांग्रेसलगायत पार्टीका नेताहरु जनप्रतिनिधिहरुको सामूहिक प्रयासलाई धन्यवाद दिन चाहन्छु।
१५. प्रस्तावित पुलहरुमा अर्जुनधारा ५ बाट ४ मा तर्ने (कज्वे भएको ठाउँ) विरिङ खोलामा पक्की पुल बनाउन प्रयास गर्दागर्दै प्राथमिकताका हिसावले र बजेट अभावले अहिलेसम्म गर्न नसकेको समेत स्मरण गर्दछु। र आगामी दिनको पहिलो प्राथमिकतामा रहनुपर्छ भन्ने कुरा समेत व्यक्त गर्दछु।
१६. सडकको आवश्यकता र उपभोक्ताको तिव्र चाहनालाई पुरा गर्न मेरो हैसियतले भ्याएसम्म भरमग्दुर प्रयास गरेकै हो । तथापि सवै चाहनाहरु पुरा हुन सकेनन् । यो निर्वाचन क्षेत्र नं २ मा यो अवधिमा संघीय बजेटमार्फत ७६ किमि सडक पिच भएको छ। यसका अतिरिक्त काम छोडेर हिडिसकेको ठेकेदारलाई बजेट व्यवस्थापन गरेर काममा लगाएको बिर्तामोड– चन्द्रगढी सडक ६ किमि र मदन भण्डारी सडकको करिव ८ किमि सडक निर्माणको समेत सगर्व जस लिन चाहन्छु ।
१७. कालोपत्रे सडकहरुमा मुख्य गरी ७२ किमि लम्वाई भएको झापा क्षेत्र नं २ चक्रपथ, जसको परिकल्पना नै म निर्वाचित भएपछि गरिएको थियो त्यसको रेखाङ्कन तथा सर्वेक्षण गरी ३० किमि खण्डको डीपीआरसमेत सम्पन्न भएको छ भने कुल ७२ किमि लम्वाईमध्ये २२ किमि पुरानै कालोपत्रे पर्ने भएकोले ५० किमि निर्माणका लागि पहल गरिएको र ८ किमि निर्माण सम्पन्न भइसकेको साथै यो आ.व.मा १४ करोड रुपैयाँ विनियोजित रहेको छ । त्यसको काम सुरुवात भएको छैन।
१८. अन्य सडकहरुमा शहीद चन्द्र मार्ग, हर्कलाल मार्ग, गोकुल जोशी मार्ग, मुक्तिचोक– कप्तानवारी– पुष्पलाल चोक –सालवारी हँुदै जयपुरसम्म जाने सडक, कप्तानवारी– शनिश्चरे –जयपुर सडक, गोपालेडाँडा– महानन्दचोक सडक, लक्ष्मीपुर –अर्जुनधाराधाम सडक, कालिस्थान –बुट्टावारी सडक, सैनिकमोड –गोलधाप सडक प्रमुख हुन् । अन्य पचासौको संख्यामा रहेका वडा स्तरीय सडकहरुको वारेमा उल्लेख गरिएको छैन।
१९. मदन भण्डारी सडकअन्तर्गत मेरो निर्वाचन क्षेत्रमा पर्ने १३ किमि क्षेत्रमा रुख कटानको लागि विकराल समस्या थियो । त्यसमा वन डिभिजन, विभाग तथा मन्त्रालय सबैसंग प्रत्यक्ष भेटेर कार्ययोजना बनाएर रुख कटान सुनिश्चित भएकोमा हाल रुख कटान सकिने अवस्थामा पुगेको छ ।
२०. खानेपानीतर्फ यो क्षेत्रमा पर्ने प्रायजसो सबै योजनाहरुमा केही न केही बजेट पार्ने प्रयत्न भयो । तर, पर्याप्त हुन सकेन र अझै आवश्यक रहेको छ । बिर्तामोड खानेपानी आयोजना, कोलाटोली खानेपानी योजना, बृहत अर्जुनधारा खानेपानी आयोजना, बेलटार खानेपानी आयोजना, बुधवारे साना सहरी खानेपानी आयोजना, बिरान खानेपानी आयोजना, कैदले खानेपानी आयोजना, साठीमुरे खानेपानी आयोजना, तथा भोटेटार खानेपानी आयोजनामा संघ तथा प्रदेश सरकारबाट बजेट बिनियोजन भएको छ । हाल कैदले, बेलटार तथा बृहत अर्जुनधारा खानेपानी आयोजनाको मुहान क्षतिग्रस्त भएको र त्यसलाइ संबोधन गर्नका लागि परियोजनासहित मन्त्रालयमा पेश गरिएकोमा हालसम्म स्वीकृत हुन सकेको छैन ।
२१. सिँचाइतर्फ चौरासी विघे सिंचाइ आयोजना, सखुवागाछी चेक ड्याम्प, २७ बिघे पैनी मुहान तथा नहर निर्माण, हिलेखोला तथा सेतीपानी खोलाको नहर निर्माण, सानेसी सिँचाइ आयोजना तथा आवश्यक ११ स्थानमा भूमिगत सिँचाइ आयोजनाका लागि बजेट बिनियोजन भई काम संचालन भएको छ भने चौरासी बिघे सिँचाइ आयोजनाको काम भर्खर ठेक्का संझौताको चरणमा रहेको छ।
२२. यो निर्वाचन क्षेत्रमा झापामा नाम चलेका ठूला खोलाहरु छन् । जसको कारण खोलाले धार परिवर्तन गर्दा कैयौ जग्गाधनीका जग्गाहरु खोलामा परेका छन् र अहिले तत् तत् क्षेत्रमा जग्गा विवाद कायम छ। खोलाको धार परिवर्तन गर्नवाट रोक्न तटबन्धको काम पनि प्रभावकारी रुपमा संचालन गरिएको छ। पर्याप्त त नभनौ तर उल्लेख्य चाहिँ भन्न मिल्छ। बिरिङ खोला तटबन्ध अर्जुनधारा १,७,५, विरिङ खोला तटवन्ध कन्काई ८ र ९, हडियाखोला तटबन्ध बुद्धशान्ति १ र ३, नेतेखेला तटबन्ध अर्जुनधारा १, टाङटिङखोला तटबन्ध अर्जुनधारा २, सुखानी खोला तटबन्ध अर्जुनधारा ३, दहीझोडा तटबन्ध अर्जुनधारा ४, अधुवाखोला तटवन्ध विर्तामोड ३ ४, हर्चना खोला तटबन्ध विर्तामोड ७, देउनिया खोला तटबन्ध बिर्तामोड ८, भोर्लेनी भिर पहिरो नियन्त्रण अर्जुनधारा २ मुख्य छन् ।
२३. शिक्षा क्षेत्रमा पनि महत्वपूर्ण योजनाहरु संचालन भएका छन् । २००० भन्दा बढी विद्यार्थी भएका ३ वटा विद्यालयहरुले ६ करोडमाथिका भवन प्राप्त गरेका छन् । देवी, महेन्द्र रत्न र मोहनमाया माविले यो बजेट प्राप्त गरेका हुन् । देवी मावि निर्माणमा नै जुटिसकेको छ भने महेन्द्र रत्न र मोहनमाया माविले भर्खरै मात्र स्वीकृति प्राप्त गरेका छन् ।
२४. चिनियाँ राजदूतावासको सहयोगमा बिर्तामोड ८ स्थित शुक्रराज आधारभूत विद्यालय र बिर्तामोड ९ स्थित देवकोटा आधारभूत विद्यालयमा ५०/५० लाख बजेटमा भवन निर्माण भएका छन् । शुक्रराज आविको भवन उद्घाटन समेत भइसकेको छ भने देवकोटा आविको भवन निर्माणाधीन छ ।
२५. यो क्षेत्रका एसइई परीक्षामा सफल हुन नसकेका विद्यार्थीहरुलाई लक्षित गरेर प्रधानमन्त्री तथा मन्त्रिपरिषद कार्यालयको समन्वयमा १३६५ विद्यार्थीलाई निःशुल्क अनलाइन कक्षा संचालन गरिएको छ ।
२६. चिनियाँ दूतावासकै सहयोगमा शनिश्चरे मावि अर्जुनधारा र दुर्गा मावि बिर्तामोडका आधारभूत तहका विद्यार्थीहरुलाई शैक्षिक सामग्रीहरु वितरण गरिएको छ ।
२७. भवन अभाव भएका लक्ष्मी मावि अर्जुनधारा, दुर्गा मावि विर्तामोड, मदरसा बिर्तामोड र सप्तऋषि गुरुकुल अर्जुनधाराको भवन निर्माणका लागि यसै आ.व.मा कार्य संचालन गर्ने प्रयास भइरहेको छ ।
२८. योजना ठेक्का लागेर पनि बजेट अभावमा निर्माण रोकिने अवस्था धेरै योजनाहरुमा देखिएको छ। त्यसैको शिकार हुन लागेको शनिश्चरे अस्पताल अर्जुनधाराको लागि १८ करोडमा ठेक्का लागेको तर, बजेट निकासा नभएर रोकिएको अवस्थामा विशेष पहल गरी निर्माण प्रकृया अगाडी बढाउन आवश्यक बजेट प्रवन्ध गरिएको छ।
२९. अर्जुनधारा नगर अस्पताल, तथा बिर्तामोड नगर अस्पताल तथा खुदुनावारी स्वास्थ्य चौकीलाई विदेशी दातृ निकायको सहयोगमा आवश्यक उपकरणहरुसहित सामग्रीहरु वितरण गरिएको छ। अर्जुनधारा नगर अस्पतालमा अपरेशन थिएटर संचालन गरिएको छ ।
३०. धेरै ठुलो मेहेनतले बुद्धशान्ति गाउँपालिकामा निर्माण भएको अस्पतालको नाम “भागिरथा न्यौपाने बुद्धशान्ति अस्पताल” राख्ने काम भएको छ।
३१. संघीय मामिला तथा सामान्य प्रशासन मन्त्रालयको बजेटमार्फत सुसेली सामुदायिक भवन, वाइजुराज सामुदायिक भवन निर्माण कार्यहरु भएका छन् ।
३२. बिर्तामोड नगरपालिकाको प्रशासनिक भवन, बिर्ताबजारको कृषि भवन समेत निर्माण सम्पन्न भएको छ ।
३३. बिर्तामोड, अर्जुनधारा ,बुद्धशान्ति पालिकाहरुमा सुकुम्वासी तथा अव्यवस्थित बसोबासीहरुलाई धनीपुर्जा वितरण सुरुवात गरिएको छ ।
३४. डोमालाल रंगशाला, अर्जुनधारा खेलमैदान, बिर्तामोड कभर्ड हल लगायत खेलमैदानको स्तरोन्नतिका कामहरु भएका छन् ।
३५. डोमालाल रंगशालाको स्वामित्व विवाद व्यवस्थापनका लागि भूमि व्यवस्था, सहकारी तथा गरिवी निवारण मन्त्रालय, गुठी संस्थानबीच आवश्यक समन्वय गरी त्यहाँका जोताहाहरुको व्यवस्थापन तथा रंगशालाको सरकारीकरणका लागि गुठी संस्थान र मन्त्रालयबीच सहकार्य गर्ने सहमति भएको र सर्वोच्च अदालतको फैसला कार्यान्वयन र फिल्डको वस्तुस्थिति बुझ्न जाँचवुझ समिति गठन गरि पठाएकोमा उक्त समितिले आफ्नो प्रतिवेदन बुझाइसकेको छ ।
३६. यो क्षेत्रका ३ वटा पालिकाहरु बिर्तामोड, बुद्धशान्ति र अर्जुनधारा हात्ती प्रभावित क्षेत्रहरु हुन् । हात्ती नियन्त्रणका लागि केही न केही प्रयत्न गरिएको छ । हालसम्म १३ किमि फेन्सिङ तार लगाउने कार्य भएको छ भने हात्ती आगमन सूचना प्रणाली (बाहुनडाँगीमा) स्थापना गरिएको छ। फेन्सिङ लगाउने कार्य यस वर्ष पनि निरन्तर छ ।
३७. सुखानी शहीद स्मृति पार्क, विराट भरत विश्रान्ती एवम् विराट पोखर जस्ता पर्यटकीय स्थलको संरक्षण संवद्र्धन र उपभोगका लागि विभिन्न कार्यक्रमहरुसंग सम्वन्धित बजेट निकासा भएको छ। यसै आ.व.मा निकासा हुनुपर्ने सुखानी शहीद स्मृति पार्कको घेरावारा निर्माणका लागि विनियोजित १० करोड रुपैयाँ भने हाल सरकारले रोकिराखेको छ।
३८. अत्यन्तै पेचिलो बनेको अर्जुनधारा १ को सैनिक तालिम केन्द्र र विगत ५० वर्षदेखि बसोबास गर्दै आएका २०० परिवारको जग्गा विवादको निरुपणका लागि सैद्धान्तिक सहमति भएको छ। तालिमको लागि आवश्यक जग्गा छोड्न र सिमाना लगाउन भूमि व्यवस्था सहकारी तथा गरिवी निवारण मन्त्रालय ,नापी विभाग, सेनाको पृतना र सभामुख, नगरपालिका तथा स्थानीयबीच स्थलगत रुपमा नै सहमति भएको हो र सिमाना निर्धारणको जिम्मा नापी विभाग / नापी कार्यालयलाई दिइएको छ ।
३९. देशको एउटा प्रमुख नगदेवाली सुपारीको राजधानी यही निर्वाचन क्षेत्र भएकोले यसको व्यवस्थापनका लागि मुख्य रुपमा अनुसन्धान तथा प्रशोधन केन्द्र स्थापना गरी व्यवसायिक विस्तारको महत्वकांक्षी योजना तयार गरेर लागेकोमा गत आश्विनमा आएको बाढीले प्रस्तावित जग्गा बालुवामा परिणत गरेपछि केही समस्या देखापरेको छ । तथापि सुपारीलाई कृषि वालीको रुपमा सूचीकृत गरिएको छ। यससंगै यसको निकासी पैठारीमा पनि व्यापक समस्या देखिएकोले त्यसको समाधानको लागि विशेष पहल गरिएको छ ।
४०. यो निर्वाचन क्षेत्रको समृद्धिका लागि मुख्यरुपमा दुध, मासु ,बाँस र सुपारीको व्यवसायिक विकास आवश्यक छ भन्ने निष्कर्ष निकाली चिनियाँ राजदूतावासमार्फत अनुसन्धान तथा सहयोगको कार्यक्रम अगाडी वढाइएको छ । हालसम्म दुध तथा माछाको लागि संझौता भइसकेको छ भने बाँस र सुपारीको अनुसन्धान गरिरहेको छ।
४१. मैले संसदमा प्राप्त गरेको जिम्मेवारीले गर्दा मन हुँदाहुँदै पनि आफ्नो क्षेत्रको अपेक्षित भ्रमण गर्न सकिनँ, तथापि यहाँका हरेक गतिविधिसंग नियमित रुपमा जानकार नै रहें। यो ३ वर्षे कार्यकालमा जम्मा १९ पटक क्षेत्र भ्रमण गरेको रहेछु ।
४२. म सभामुखमा निर्वाचित भएपछि आफै उपस्थित नभएपनि सुनेसम्म र जानकारी पाएसम्म यो क्षेत्रका मृत्युका सवै दुखद घटनामा श्रद्धाञ्जली / समवेदना पत्र पठाएको छु। म क्षेत्रमा आएका बेला सकेसम्म सवैकोमा पुग्ने प्रयास गरेको छु र आफै उपस्थित हुन नसक्दा मेरो सचिवालयमार्फत पठाउने गरेको छु। हालसम्म मैले २१२२ परिवारमा यो पत्र पठाएको छु। यो सानो काम गरेपनि आफैले आफैलाई धन्य महसुस गरेको छु।
४३. विभिन्न निकायहरुसंग समन्वय गरेर समाजका जेष्ठ नागरिकहरुको सम्मानार्थ मायाको स्मृतिस्वरुप लौरो उपहार वितरण गरिएको छ ।
४४. विभिन्न निकायहरुसंग समन्वय गरेर यो क्षेत्रका विपन्न परिवारहरुका लागि २००० थान झुल तथा आवश्यक संख्यामा सेनिटरी प्याड वितरण गरिएको छ।
४५. यो क्षेत्रको विकासमा ५ वर्षे कार्यकालका लागि मैले देखेका प्रमुख सपनाहरुमध्ये बिर्तामोडको ढल निकास, अधुवा खोला कोरिडोर, विरिङ तटबन्ध र बाइपास कोरिडोर, सखुवागाछी चेकड्यामसहितको सिँचाइ आयोजना, हडिया खोला तटवन्ध, डोमालाल तथ अर्जुनधारा रंगशाला, हात्ती प्रभावको पूर्ण नियन्त्रण, महाभारतकालीन क्षेत्रहरु समेटिएको पर्यटकीय सर्कीट संचालन, दुध, मासु, बाँस, सुपारी र पानीवाला नरिवलको व्यवसायीकरण र त्योसंगै जोडिएको युवा रोजगारी एवम् सीपयुक्त जनशक्ति विकास पुरा हुन नपाउँदै कार्यकाल भाँचिएको छ।
४६. अन्त्यमा, यो निर्वाचन क्षेत्रका सम्पूर्ण मतदाताहरुप्रति हार्दिक आभार व्यक्त गर्दछु। पदीय जिम्मेवारी बहन गर्ने क्रममा मैले सबै राजनैतिक दलहरुलाई समन्वय गरेर नै लैजान सकें भन्ने लागेको छ । यसमा तपाईहरुका केही सुझाव भए पाउने अपेक्षा राख्दछु। धन्यवाद
