झापा, माघ ९ । झापाको गौरीगञ्जबाट १०२ ग्राम ब्राउनसुगर बरामद भएको छ ।
हिजो दिउँसो १२ बजे गौरीगञ्ज १ कुञ्जीबारीस्थित नेपाल –भारत सिमानामा प्रहरी चौकी कुञ्जिबारी र बीओपी कुञ्जिबारीबाट खटिएको सशस्त्र प्रहरी बल नेपालको संयुक्त टोलीले चेकजाँच गर्दा भारतबाट नेपालतर्फ आउँदै गरेको मे ३ प २९६८ नम्बरको मोटरसाइकलमा चालक तत्काल नामथर वतन नखुलेका पुरुषले चेकिङ टोलीलाई देख्नसाथ मोटरसाइकल छोडेर फरार भएका थिए ।
मोटरसाइकल चेकजाँच गर्ने क्रममा मोटरसाइकलको लेगार्डमा प्लास्टिकको झोलाभित्र रहेको चिनीमा लुकाएर प्लास्टिकले पोको पारेको १०२ ग्राम ब्राउनसुगर फेला परेको थियो । ब्राउनसुगर र मोटरसाइकल नियन्त्रणमा लिई इलाका प्रहरी कार्यालय झिलझिलेमा ल्याइएको जिल्ला प्रहरी कार्यालयले जनाएको छ ।
