बिर्तामोड मंसिर, ४ । तिहारलगत्तै सुरु हुने छठ पूजाको तयारीका लागि खोला, नहर र पोखरी सिँगार्ने काम सुरु हुने गर्छ । यो वर्ष भने छठ सुरु भइसके पनि झापाका अधिकांश घाटहरु सुनसान छन् । कोरोना संक्रमणको जोखिम रहेकाले श्रद्धालु भक्तहरुले घरमै पूजाको तयारी गरिरहेका छन् । कोरोना संक्रमणलाई मध्यनजर गर्दै स्थानीय प्रशासनले पनि सुरक्षित रुपमा चाडपर्व मनाउन अनुरोध गरेको झापाका सहायक प्रमुख जिल्ला अधिकारी उमेश पाण्डेले बताए । उनका अनुसार सर्वसाधारणले घरमै बसेर छठ मनाउने तयारी गरेका छन् । “यस वर्ष कुनै पनि खोला, पोखरी, नहरमा छठ मनाइदैन” पाण्डेले भने, “हामीले १५ वटै स्थानीय पालिकाका प्रमुखलाई राखेर यो निर्णय गरेका हौँ ।”
![](https://pratidindaily.com/wp-content/uploads/2020/11/xat-news-1024x768.jpg)
त्यस्तै, छठ पर्व मनाउनका लागि सधैं सुनसरी मोरङ सिँचाइ आयोजनाको नहरमा पानी छाडिन्थ्यो । तर यो पटक भने नहरमा पानी आएको छैन । स्थानीय प्रशासनले पानी नछाड्न सुनसरी मोरङ सिँचाइ आयोजनालाई आग्रह गरेको थियो । तर मोरङका सहायक प्रमुख जिल्ला अधिकारी ध्रुवबहादुर खड्काका अनुसार धान काट्ने सिजन भएकाले तत्काल पानी नछाड्न सर्वसाधारणले नै आयोजनालाई आग्रह गरेका छन् । पानी भएका खोला र पोखरीका किनारमा पनि कुनै रौनक छैन । नत्र यतिबेला छठ पूजाका लागि सरसफाइ गर्ने, सिँगार्ने, झिलिमिली बनाउने र भजनले गुन्जायमान हुन्थ्यो ।
भीडभाड गर्दा सक्रमणको जोखिम उच्च हुने भएकाले अर्घ दिनमात्र घाटमा जाने तयारी विराटनगरवासीले गरेका छन् । आस्था र विश्वासको पर्व छठ अहिलेको अवस्थामा सुरक्षित रुपमा घरमा मनाउनु सबैको हितमा छ ।