कुमरखोद, असोज २३ । झापा गाउँपालिकाको वाल शिक्षक संजालले विजयादशमी , शुभदिपावली तथा छैठ पर्वको अवसरमा शुभकामना आदानप्रदान तथा सम्मान कार्यक्रम सम्पन्न गरेको छ ।
डिल्लीराज माविको सभाहलमा झापा गाउँपालिका वाल शिक्षक संजालका अध्यक्ष प्रतिमा राईको सभापतित्वमा भएको कार्यक्रममा प्रमुख अतिथि झापा गाउँपालिका अध्यक्ष जयनारायण शाह रहेका थिए । अध्यक्ष शाहले वाल शिक्षकहरुले ससाना वालवालिकालाई स्कुलमा आप्mनो सन्तान सरह हेरचाह तथा स्याहारसुसार गर्ने गरेको भन्दै वाल शिक्षकहरुको प्रशंसा गरेका थिए । उनले झापा गाउँपालिकाबाट हुनसक्ने सहयोगको प्रतिवद्धता समेत व्यक्त गरे ।
झापा गाउँपालिका वाल शिक्षक संजालका उपाध्यक्ष सानवती राजवंशीले स्वागत मन्तव्यसहित कार्यक्रमको औचित्यमाथि प्रकाश पारेकी थिइन् । कार्यक्रममा झापा गापा शिक्षक संघका अध्यक्ष जगन्नाथ राजवंशी , नेपाल राष्ट्रिय शिक्षक संगठन झापा गापाका अध्यक्ष टिका कट्टेल , नेपाल शिक्षक संघका उपाध्यक्ष विष्णुमाया सिटौला , मदन भण्डारी , वडा अध्यक्षहरु नेत्रबहादुर खड्का , मोतीलाल गणेशलगायतले शुभकामना मन्तव्य राखेका थिए । कार्यक्रमको संचालन कल्पनाकुमारी खड्काले गरेकी थिईन् ।
