देविका अधिकारी,
हल्दिवारी । टाइफाइड रोग विरुद्धको खोप अभियान तथा नियमित खोप संचालनसम्बन्धी एक दिवसीय अन्तरक्रिया हल्दिवारी गाउँपालिकामा सम्पन्न भएको छ ।
स्वास्थ्य शाखा हल्दिवारीको आयोजनामा भएको कार्यक्रममा नेपालमा पहिलो पटक टाइफाइड विरुद्धको खोप सुरु हुन लागेको स्वास्थ्य शाखा प्रमुख पुष्कर निरौलाले जानकारी दिए ।
१५ महिना देखि १५ वर्षसम्म उमेर समूहका करिब ८ हजार ५०० बालबालिकाहरूलाई यो खोप लगाइने छ । अन्य उमेर समूहमा भन्दा यो समूहका व्यक्तिहरूलाई रोगको संक्रमण ११ गुणा बढी हुने भएकाले पनि पहिलो चरणमा लक्षित समूह यो रहेको निरौलाले जानकारी दिए ।विद्यार्थीहरुलाई विद्यालयमै र विद्यालय नजाने बालबालिकाहरूलाई खोप केन्द्रमा यो सेवा उपलब्ध हुने पनि उनले बताए ।
जनप्रतिनिधि, प्रहरी, स्वास्थ्यकर्मी, शिक्षक तथा संचारकर्मीको उपस्थितिमा भएको अन्तक्रियामा हल्दिवारी गाउँपालिकाका प्रमुख प्रशासकीय अधिकृत प्रविन दाहालको अध्यक्षता रहेको थियो भने कार्यक्रममा स्वागत मन्तव्य स्वास्थ्यकर्मी याम न्यौपानेले राखेका थिए । कार्यक्रममा बोल्दै प्रमुख प्रशासकीय अधिकृत दाहालले आनीबानी, खानेपानी तथा दिसापिसाबको माध्यमबाट फैलिने यो रोग नियन्त्रणमा सबैले सचेत हुनुपर्ने धारणा राखे । चैत २५ गतेबाट सुरु हुने खोप अभियानमा कोही पनि नछुटुन् भनेर आ–आफ्नो ठाउँबाट सबैले प्रचारप्रसारमा सहयोग गर्न स्वास्थ्य शाखा हल्दिवारीले आह्वान गरेको छ।
