बिर्तामोड , साउन ९ । तीनजनाको ज्यान जानेगरी भक्तपुरको सल्लाघारीमा गुडिरहेको मिनीबसमाथि अचानक रुख बज्रिँएकोजस्तो घटना बिर्तामोडमा पनि भएको छ ।
![](https://pratidindaily.com/wp-content/uploads/2022/07/nn-762x1024.jpg)
बिर्तामोडस्थित मातृभाग्य रेखा ग्यारेजनजिक रोकिराखेको को २ च ४८७ नं को केरियरमाथि रुखको हाँगा भाच्चिएर झरेको हो । आफू उभिएको ठाउँभन्दा सय मिटर पश्चिम सो घटना भएको प्रत्यक्षदर्शी रोम घिमिरेले बताए ।
‘ म बाटोमा यात्रामा थिएँ । पश्चिमतर्फ नै जाँदै थिएँ । हावा पनि थिएन । अत्यन्त नर्मल अबस्थामा रुखको हाँगा खस्यो । गाडीको स्ट्रिङमा ड्राइभर ढोका खोलेर बसिरहेको थियो ’उनले भने,‘ हाँगा गाडीको देब्रेपट्टि खस्यो । त्यो ड्राईभरको दिन बलियो रहेछ । अनि हाम्रो पनि ।’सो घटनामा केरियरमा सामान्य क्षति पुगेपनि चालकलाई केही नभएको इलाका प्रहरी कार्यालय बिर्तामोडका डिएसपी रुगमबहादुर कुँवरले बताए ।
बिर्तामोड– खुदुनाबारी हुँदै दानाबारी जाने सडकखण्डको ज्यामुद्वारमा दुईवटा सखुवाको रुख लड्न आँटेको भन्दै स्थानीय खगेन्द्र लिङ्देनले त्यसतर्फ सम्बन्धित निकायको ध्यानाकर्षण गराएका छन् ।
भक्तपुर नगरपालिका–१ सल्लाघारीस्थित चोङ्गा गणेश सल्लाघारी दूधपाटी सडक छेउको सल्लाको रूख ढलेर बस र स्कुटर किच्दा तीनजनाको मृत्यु भएको हो। आइतबार दिउँसो काठमाडौँबाट यात्रु बोकेर दूधपाटी हुँदै कमलविनायक जाँदै गरेको बा२ख ३५८४ नंको बस र दूधपाटीबाट सल्लाघारीतर्फ जाँदै गरेको बा६१प ३९७८ नंको स्कुटरलाई ढलेको रूखले किच्दा बसमा सवार दुई तथा स्कुटरमा सवार एकजनाको मृत्यु भएको थियो । मृत्यु हुनेमा बसमा सवार भक्तपुर नगरपालिका–२ व्यासीका २५ वर्षीय विशेष खर्बुजा, चाँगुनारायण नगरपालिका–२ का ५५ वर्षीय न्हुच्छेराम बखाद्यो र स्कुटरमा सवार सर्लाहीको हरिवन नगरपालिका–४ का ४५ वर्षीय राजकुमार भुजेल रहेको महानगरीय प्रहरी परिसर भक्तपुरका प्रहरी नायब उपरीक्षक राजु पाण्डेले जानकारी दिए ।