बिर्तामोड, असोज ६ ।बिर्तामोड नगरपालिकाले घर नक्साको अभिलेखीकरण गर्ने भएको छ ।
नगरप्रमुख पवित्रा महतारा प्रसाईको अध्यक्षतामा बिहीबार बसेको कार्यपालिकाको बैठकले घर नक्सा अभिलेखीकरण गर्ने निर्णय गरेको हो । अबदेखि बिर्तामोड नगर क्षेत्रभित्र सरकारी, अर्धसरकारी, संस्थान तथा निजी घर,भवनहरु निर्माण गर्दा अनिवार्य रुपमा नगरपालिकाबाट ईजाजत लिई नक्सा पास गरेर मात्र निर्माण कार्य गर्नुपर्ने बैठकले निर्णय गरेको छ ।
यसअघि घर,भवन निर्माणका लागि ईजाजत नलिएका नक्सापास नभई बनेका सम्पूर्ण सरकारी, अर्धसरकारी, संस्थान तथा निजी घर तथा भवनहरुको अभिलेखीकरण २०७९ चैत्र मसान्तभित्र सम्पन्न गरी लगत तयार गर्ने र त्यसपछि भवन निर्माण इजाजत नलिई निर्माण सम्पन्न भईसकेका कुनै पनि घर,भवनहरुको अभिलेखीकरण कार्य नगर्ने साथै त्यस प्रकारका भवनहरुमा व्यावसायिक कारोबारको अनुमति नदिने पनि नगरपालिकाले निर्णय गरेको छ ।
बैठकले भारतबाट आउने अस्वस्थ्यकर मरेका माछाहरुको नगरपालिका क्षेत्रभित्र बिक्री वितरण गर्न आगामी कार्तिक १ गतेबाट पूर्णरुपमा रोक लगाउने निर्णय गरेको छ ।त्यसपछि पनि मरेका माछा बिक्री वितरण गरेको पाईएमा उक्त माछा जफत गरी नष्ट गर्ने र सामग्री समेतजफत गरि व्यवसाय बन्द गर्न लगाउने निर्णय गरेको छ ।बैठकले कृषिजन्य उत्पादनहरुमा विषादीको मापनका लागि तरकारी तथा फलफूलहरुको विषादीको नियमित परीक्षणको व्यवस्था गर्ने र नगरक्षेत्रभित्र उत्पादन हुने तरकारी तथा खाद्यान्न बालीहरुमा विषादी न्यूनीकरण गर्ने कार्यक्रमहरु सञ्चालन गर्ने, बिर्तामोड ५ स्थित कृषिथोक बजार प्रवेश गर्ने सम्पूर्ण तरकारी तथा फलफूलहरुको विषादी परीक्षण गर्ने हालको व्यवस्थालाई थप प्रभावकारी बनाएर पौष १ गतेबाट विषादी परीक्षणपछि मात्र थोकबजारभित्र तरकारी प्रवेश गर्न दिने र न्यूनतम मापदण्डभन्दा बढी विषादी देखिएका तरकारी तथा फलफूलहरुलाई पूर्ण रुपमा नष्ट गर्ने बैठकले निर्णय गरेको छ ।
यस्तै वडा नम्बर ५ को बुधबारे हटियाभित्र नवनिर्मित भवनमा आधारभूत स्वास्थ्य केन्द्र स्थानान्तरण गरी स्वास्थ्य सेवा प्रवाह गर्नुपर्ने भएकोले हाल उक्त नवनिर्मित स्वास्थ्य संस्थाको भवनको आसपासको क्षेत्रमा पशु तथा पंछीपालन तथा बध गरी बिक्री वितरण गरिरहेको पाईएकाले उक्त क्रियाकलापमा पूर्णरुपमा रोक लगाई स्वास्थ्य संस्थाको आसपासको क्षेत्र सफा र स्वच्छ र प्रदूषणरहित बनाउन वडामार्फत आवश्यक कार्य अघि बढाउने निर्णय नगरपालिकाले गरेको छ ।
बैठकले भू–उपयोग ऐन २०७६ तथा भू–उपयोग नियमावली २०७९ अनुसार बिर्तामोड नगरपालिका क्षेत्रभित्रका जग्गा वर्गीकरणका लागि फिल्डमै गएर जग्गाको हालको सबै कित्ता नम्बरहरु अद्यावधिक गरी स्थलरुप नक्सा तयार गर्ने तथा जग्गा वर्गीकरणका मापदण्डबमोजिम जग्गा वर्गीकरणका लागि सिफारिस गर्न कार्यालयको मौजुदा जनशक्तिबाट मात्र सम्भव नहुने देखिएकाले यस कार्यका लागि कार्यालयले बाह्य परामर्शदाताबाट सेवा खरिद गर्ने निर्णय गरेको छ ।
यस्तै बैठकले नगरपालिकाको स्वामित्वमा रहेको हेभी इक्विपमेन्ट सवारीसाधनहरु लिलामी प्रक्रिया अघि बढाउने सम्बन्धी कार्यका लागि नगर उपप्रमुख नगेन्द्रप्रसाद संग्रौलाको संयोजकत्वमा समिति निर्माण गरेको छ । समितिको सदस्यहरुमा वडा नम्बर ६का वडाध्यक्ष सूर्यप्रसाद कन्दङ्वा,लेखा अधिकृत तेजिन्द्र तामाङ, मेकानिकल ईञ्जिनियर, यातायात व्यवस्था कार्यालय मेची बिर्तामोड र समितिको सदस्य सचिवमा शाखा अधिकृत मेघराज बास्तोला रहेका छन् । यस्तै गरामनी बजारमा रहेको दुर्गा मन्दिरको स्वामित्वमा रहेको व्यावसायिक सटरहरुको भाडा दरको पुनरावलोकन गर्न तथा गरामनीमा रहेको साझा संस्थाको जग्गा तथा भवनको उपयोग तथा व्यवस्थापन गर्ने सम्बन्धी विषयमा अध्ययन गरि आगामी कार्यपालिकाको बैठकमा प्रतिवेदन पेश गर्नेगरी नगर उपप्रमुख संग्रौलाको संयोजकत्वमा वडा नम्बर ८का वडाध्यक्ष अजय कार्की,वडा नम्बर ९का वडाध्यक्ष हरिप्रसाद चौलागाई सदस्य रहने गरि कार्यदल गठन गरेको छ ।
