झापा , भदौ १ । भद्रपुर-८ स्थित प्रादेशिक अस्पताल आसपास आज भदौ १ गतेदेखि सुर्तीजन्य पदार्थ तथा मदिरा बेचबिखन पूर्ण रुपमा प्रतिबन्ध लगाइएको छ।
भद्रपुर नगरपालिका ८ नम्बर वडा कार्यालयले आफ्नो वडामा पर्ने प्रादेशिक अस्पताल लक्षित गरी पहिलो चरण अस्पताल आसपासको १०० मिटर वरिपरि (सार्वजनिक स्थल) मा सुर्तीजन्य पदार्थ तथा मदिरा बेचबिखनमा प्रतिबन्ध लगाएको हो । वडा अध्यक्ष गौरव सुब्बा मनोजले पहिलो चरणमा अस्पताल लक्षित गरी यो अभियानको सुरुवात गरेको बताए । ‘म लिम्बुको छोरा हुँ, म लागे भने लागे, यो अभियान सफल बनाएर छाड्छु,’ उनले भने, ‘सुर्तीजन्य तथा मादक पदार्थ निषेधित क्षेत्रमा बिक्री तथा सेवन गर्ने दुवै पक्षलाई कानुन बमोजिम कारबाही गरिन्छ ।’ यो अभियान सफल बनाउन सबैको साथ र सहयोगको लागि उनले अपिल समेत गरेका छन् ।
सो अभियान सफल बनाउन वडा कार्यालयले विगत एक महिनादेखि सन्देश तथा जनचेतना मूलक अभियान गरिरहेका थिए । वडा कार्यालयले अस्पताल वरिपरिको सडकमा सर्वसाधारणलाई देख्ने गरी होडिङ बोर्ड लगाउनुका साथै पसलहरूमा स्टिकर टाँस समेत गरिसकेको छ । सुर्तीजन्य पदार्थ नियन्त्रण तथा रोकथाम ऐन २०६८ को बारेमा जानकारी गराउँदै १८ वर्ष नपुगेकाले सुर्तीजन्य तथा मदिरा पदार्थ बिक्री तथा सेवन गर्नु हुँदैन । १८ वर्ष मुनिका बालबालिकाले सुर्तीजन्य तथा मदिरा पदार्थ बिक्री तथा सेवन गरेमा दुवैलाई कानुन बमोजिम कारबाही हुने ऐनमा उल्लेख छ ।
