झापा, भदौ ७ । सदन खुलेदेखि झापाको गिरीबन्धु टी इस्टेट प्रकरणले लगातार चर्चा पाएको छ ।
करीव एक महिनापछि हिजो खुलेकै दिन सदनमा नेपाली कांग्रेसका सांसद रामहरि खतिवडाले गिरीबन्धु टी इस्टेटको जग्गा प्रकरणको छानबिन हुनुपर्ने माग गरेका थिए भने नेकपा एमालेका अध्यक्ष केपी शर्मा ओलीले गिरीबन्धु टी इस्टेटको जग्गाबारे अनुसन्धान गर्न आवश्यक भए सरकारले अनुसन्धान गर्नसक्ने बताएका थिए । त्यस्तै आज पनि नेपाली कांग्रेसका सांसद राजन केसीले रहेको गिरीबन्धु टी इस्टेटको जग्गा सट्टापट्टाले लगातार खरबौं घोटाला भएको दावी गरेका छन्।
प्रतिनिधिसभा बैठकमा बोल्दै सांसद केसीले गिरीबन्धु टी इस्टेटको जग्गा सट्टापट्टामा खरबौं रकम घोटाला भएको भन्दै छानबिनको माग गरेका हुन्।
उनले ललिता निवासभन्दा ठूलो घोटाला गिरीबन्धुमा भएको भन्दै छानबिन हुनुपर्ने बताए। ‘५ सय बिगाह बहुमूल्य जग्गा दुर्गम एरियामा सट्टापट्टा गरेर दोहन गर्न मिल्छ? गिरीबन्धुको तुलनामा ललिता निवास प्रकरण केही होइन। त्यहाँ हालको मूल्यमा खर्बौको घोटाला भएको छ, ’उनले भने,‘ छानबिन गर्नुपर्ने होइन र ?
नेता केसीले गिरीबन्धुलगायत वाइडबडी, गोकर्ण रिसोर्ट र सेक्युरिटी प्रेसमाथि छानबिनको माग गरे। नेकपा एमाले सरकारमा हुँदा गिरीबन्धु टी इस्टेट जग्गा प्रकरण भएको भन्दै सत्तारुढ दलका नेताहरुले त्यस प्रकरणको छानबिन हुनुपर्ने माग गरिरहेका छन् ।
