झापा, असोज १३ । नेकपा एकीकृत समाजवादी पार्टीले भोलिबाट शुरु गर्न लागेको मेची–महाकाली जागरण यात्राको तयारी पूरा भएको छ ।
काँकरभिट्टाबाट शुरु गरिने यात्रा एक हजार किलोमिटरको रहने बताईएको छ । शनिवार काँकरभिट्टामा पत्रकार सम्मेलनको आयोजना गर्दै जागरण यात्राका विषयमा जानकारी दिईएको थियो ।
जागरण यात्राका विषयमा पार्टीका उपमहासचिव तथा प्रचार विभाग प्रमुख जगन्नाथ खतिवडाले जानकारी गराएका थिए ।
जागरण यात्राको उद्घाटन पार्टीका अध्यक्ष माधवकुमार नेपालले गर्ने र भोलि नै बिर्तामोड तथा दमकमा जागरण सभाको आयोजना गर्ने पार्टीका उपाध्यक्ष घनेन्द्र बस्नेतले जानकारी दिए। पत्रकार सम्मेलनमा स्वागत पार्टीका झापा इन्चार्ज पुष्प पोखरेलले गरेका थिए ।
पार्टीका उप महासचिव डा. विजय पौडेलले जागरण यात्राका विषयमा जानकारी गराउँदै पार्टी स्थापनाको दुई वर्षमा सबै जनताका बीचमा पुग्न नसकेकाले आफ्ना एजेन्डा जनतामाझ पुर्याउन देशव्यापी यात्रा निकालेको बताए । उनले आफ्नोे पार्टीका एजेण्डा अरु पार्टीको भन्दा भिन्न रहेको भन्दै मेची महाकाली जागरण यात्राले पार्टीलाई थप मजबुद बनाउने विश्वास ब्यक्त गरे ।
‘पार्टीको पहिलो एजेण्डा नै बेरोजगारी उन्मुलन हो’ उनले भने,‘ देश खाली गराएर गिट्टी बालुवा छरेर मात्र विकास हुँदैन । तसर्थ देशमा बेरोजगारी उन्मुलन गर्न जरुरी छ ।’उनले कृषि उत्पादनमा बृद्धि , राष्ट्रिय उद्योगको संरक्षण पनि यात्राको एजेन्डा रहेको सुनाए ।पत्रकार सम्मेलनको सञ्चालन पार्टीका प्रचार विभाग सचिव प्रकाश खतिवडाले गरेका थिए।
