झिलझिले, असोज २७ । छिमेकी बचत तथा ऋण सहकारी संस्थाको आगामी ४ वर्षका लागि नयाँ नेतृत्व चयन भएको छ ।
शिवसताक्षी नगरपालिका वडा नम्बर ८ का मोहनप्रसाद मैनालीको अध्यक्षतामा ११ सदस्यीय संचालक समिति गठन भएको हो । यसअघि मैनाली सो सहकारीको उपाध्यक्ष रहेका थिए ।
यस्तै समितिको उपाध्यक्षमा उदयप्रकाश राई, सचिवमा गणेश घिमिरे सर्वसम्मत चयन भएका छन् । यस्तै सदस्यमा विनोद सापकोटा, यज्ञप्रसाद ओली, कृष्णकुमार श्रेष्ठ, पर्शुराम ढुंगाना, नारायणप्रसाद ढकाल, संगिता कोईराला, लवकुमारी राई शेर्मा र शिवमाया दास निर्विरोध चयन भएका छन् ।सञ्चालक समितिमा चयन भएका सापकोटा र कोइराला सो सहकारी संस्थाका संस्थापक कर्मचारी हुन् ।
यस्तै लेखा सुपरीवेक्षण समितिको संयोजकमा यामप्रसाद खड्का सर्वसम्मत चयन भएका छन् । सो समितिको सदस्यहरुमा राजन न्यौपाने र तारा प्रसाईं चयन भएका छन् ।
असोज २२ गतेदेखि सुरु भएको छिमेकी बचत तथा ऋण सहकारी संस्थाको एकाईगत साधारणसभा संस्थाको प्रधान कार्यालय झिलझिलेमा नयाँ नेतृत्व चयन गर्दै सम्पन्न भएको हो । सहकारी संस्थाका निवर्तमान अध्यक्ष गणेश प्रधानले नवनिर्वाचित समितिलाई बधाई तथा शुभकामना दिँदै संस्थाको अभिभावक भएर सदस्यको पक्षमा काम गर्न आग्रह गरे ।
४ हजार २ सय ४० सदस्य रहेको सो सहकारी संस्थाको १४ करोड ३ लाख ६७ हजार ८०० रुपैयाँ चुक्ता पुँजी रहेको छ । ११ करोड ६३ लाख४४ हजार २४० रुपैयाँ आम्दानी गरेको सहकारी संस्थाले ३ करोड ५७ लाख ४७ हजार ७६ रुपैयाँ नाफा आर्जन गरेको छ । नाफाबाट सदस्यलाई १५ प्रतिशत लाभांश वितरण गर्ने सो सहकारी संस्थाले जनाएको छ ।
