झापा, असोज २८ । बिर्तामोड वडा नम्बर–६ लाई २–० गोल अन्तरले पराजित गर्दै बिर्तामोड वडा नम्बर–१० चौंथो वडास्तरीय नकआउट फुटबल प्रतियोगिताको सेमिफाइनलमा प्रवेश गरेको छ ।
बिर्तामोड नगर खेलकुद विकास समितिको आयोजनामा बिर्तामोडको डोमालाल राजवंशी रंगशालामा भइरहेको प्रतियोगिताअन्तर्गत आज भएको अन्तिम क्वाटरफाइनलमा खेलमा बिर्तामोड–१० विजयी बनेको हो ।
निर्धारित ६० मिनेटको खेलको पहिलो हाफमा दुवै टिमले गोल गर्न सकेनन् । पहिलो हाफ बराबरीमा सकिएको खेलको दोस्रो हाफमा भने बिर्तामोड ६ माथि बिर्तामोड–१० हावी भयो । दोस्रो हाफमा बिर्तामोड–१० लाई जित दिलाउन टिम कप्तान दिपेन राई र सौरव लिम्बूले एक–एक गोल गरे ।
दोस्रो हाफको १३ औं मिनेटमा पहिलो गोल गर्दै दिपेनले टिमलाई अग्रता दिलाएका थिए । एक शुन्यले पछि परेको बिर्तामोड–६ ले बराबरी गर्ने प्रयास गरेपनि सफल हुन सकेन । दोस्रो हाफको २७ औं मिनेटमा सौरव लिम्बूले थप एक गोल गरेपछि बिर्तामोड–६दुई –शून्यले पछि पर्यो । ‘डि’ एरियामा बिर्तामोड–६ का खेलाडी त्रिपेश बस्नेतले फल्ट गरेपछि बिर्तामोड–१० ले पेनाल्टीको अवसर पाएको थियो । राजकुमार कन्दङ्वाले प्रहार गरेको पेनाल्टी बिर्तामोड–६ का गोलकिपरले बचाउ गरेका थिए । त्यसलगत्तै मैदानमा आएको बललाई सौरव लिम्बूले गरेको प्रहार भने गोल भएको थियो ।
आजको खेलमा बिर्तामोड १० का कप्तान दिपेन राई ‘म्यान अफ दि म्याच’ घोषित भए । उनले नगद १५ सय पुरस्कार पाए । उनलाई बिर्तामोड वडा नम्बर ६ का वडाध्यक्ष सूर्यप्रसाद कन्दङ्वाले पुरस्कार प्रदान गरेका थिए । प्रतियोगितामा भोलिबाट सेमिफाइनलका खेलहरु सुरु हुने छ । भोलि हुने पहिलो सेमिफाइनल खेल बिर्तामोड ४ र बिर्तामोड ५ बिच हुने आयोजक समितिका सचिव विशन लिम्बूले जानकारी दिए ।
कात्तिक २ गतेसम्म संचालन हुने प्रतियोगिताको विजेताले नगद १ लाख र उपविजेताले ५० हजार रुपैयाँ र मेडल, ट्रफी तथा प्रमाण–पत्र प्राप्त गर्नेछन् ।
