झापा, कात्तिक ४ । बीएण्डसी हस्पिटलका संचालक दुर्गा प्रसाईको इच्छाअनुसार बेहुली लिन गएजसरी इलाम दानावारीका स्थानीयहरु आज बिहानै ठूलो तामझामका साथ दुर्गा माताको मूर्ति लिन बिर्तामोड आए । तर, उनीहरुले मूर्ति नलिइ रित्तै फर्किनु पर्यो ।
माई नगरपालिकाको दानावारी शुक्रवारे बजारमा रहेको दुर्गा मन्दिरमा मूर्ति राख्ने सपना चकनाचुर मात्र भएन, लागेको खर्च कसरी तिर्ने भनेर स्थानीयहरु पिरोलिएका छन् । बीएण्डसीका संचालक प्रसाईले दुर्गाको मूर्ति दिने भएपछि स्थानीयले घटस्थापनका दिनदेखि त्यहाँ पूजापाठ शुरु गरेका थिए । त्यस्तै आज महासप्तमीका दिन प्रसाईले दिने भनेको दुर्गाको मूर्ति प्रतिष्थापनका लागि टेन्ट , गेट , मंच , खाजा पानीलगायतमा ठूलो खर्च गरेका थिए । प्रमुख अतिथि भएर जान लागेका प्रसाईले चार–पाँच हजार जना सहभागी गराउन भनेका थिए । आफूहरुले पाँच सयभन्दा बढीलाई सहभागी गराएको मन्दिर समितिका अध्यक्ष रामकुमार श्रेष्ठले बताए ।
त्यस्तै दुर्गा प्रसाई र दुर्गाको मूर्ति लिनका लागि पाँच वटा बस , ८ वटा ट्याक्सी र ६०–७० वटा मोटरसाइकल लिएर माई नगरवासीहरु नौमती बाजागाजासहित बिर्तामोड आएका थिए । जुन उत्साहका साथ उनीहरु आए, त्यो बिर्तामोडमा आएर निराशामा परिणत भयो । एमालेनिकट युवा संघका कार्यकर्ताहरुले दानाबारी जाने बाटोको सुखानीमा अवरोध गरेर प्रसाईलाई कार्यक्रमस्थलमा जान नदिने र प्रसाई पनि नजाने भएपछि माई नगरवासीहरु बिर्तामोडमा आएर तितरवितर भए । कोही बीएडसी हस्पिटलतर्फ लागे त कोही तक्षशिला तक्षशीला प्रोग्रेसिभ इङ्लिस स्कूलतिर । तक्षशीला इङ्लिस स्कूलमा मूर्ति राखिएको थियो । त्यहीबाट लाने योजना थियो । ‘जुन सपना बोकेर आएका थियौं त्यो सबै चकनाचुर भयो ’ मन्दिर समितिका अध्यक्ष श्रेष्ठले भने,‘जन्ती लिएर बेहुली लिन गएका थियौं रित्तै फर्किनु पर्यो ।’
स्थानीय कृष्ण खाकीका बुवाले २०३९ सालमा शुक्रवारे बजारमा सो दुर्गा मन्दिर बनाइदिएका थिए । पहिला मन्दिरमा माटोको मूर्ति रहेको थियो । त्यसपछि सिमेन्टको मूर्ति राखिएको थियो । प्रसाईले धातुको आकर्षक मूर्ति दिने भएपछि स्थानीयहरु उत्साहित भएका थिए । धेरै स्थानीय भक्तालुहरु निराहार बसेका थिए । उनीहरु बिर्तामोडबाट फर्किदा दिउँसोसम्म भोकै रहेका थिए । मूर्ति प्रतिष्थापन गर्न नपाउँदा स्थानीयहरु आक्रोशित भएका छन् ।
मन्दिरमा प्रतिष्थापन गर्ने भनिएको मूर्तिलाई मन्दिर समितिका अध्यक्ष श्रेष्ठसहित १० जनाले घटस्थापनाकै दिन तक्षशीला स्कूलमा आएर पूजापाठ गरिसकेका थिए । महासप्तमीका दिन बिहान ९.३० बजे त्यसलाई शुक्रवारेमा लगेर प्रतिष्थापन गर्ने साइत रहेको थियो । तामझामसहित दुर्गाको मूर्ति लानका लागि करिव अढाई लाख रुपैयाँ खर्च भएको अध्यक्ष श्रेष्ठले बताए । ‘ यति धेरै खर्च भयो मूर्ति पनि पाइएन’ उनले भने ,‘मन्दिर समितिसंग पैसा छैन कसरी तिर्ने होला ? ’
