झापा, माघ २६ । कोशी प्रदेश सरकार र प्रदेश पुनः नामकरण संघर्ष समितिबीच आज पुनः वार्ता हुने भएको छ । हिजो पहिलो दिन भएको वार्ता सकारात्मक रहेको दुवै पक्षले प्रतिक्रिया दिएका छन् ।
![](https://pratidindaily.com/wp-content/uploads/2024/02/thumb-2.jpg)
विराटनगरको होटल बिगमा हिजो दिउँसो ४ बजेदेखि वार्ता टोलीबीच छलफल शुरु भएको थियो । सरकारको तर्फबाट निर्माण भएको वार्ता टोलीका संयोजक तथा भौतिक पूर्वाधार विकासमन्त्री कमलप्रसाद जबेगूले वार्ता सकारात्मक भएको प्रतिक्रिया दिए । ‘हिजोको छलफलमा आ–आफ्ना कुरा राख्ने काम भएको छ,’ उनले भने, ‘आज बिहान ८ बजे पुनः बस्ने गरी आजलाई सकिएको छ । छलफल सकारात्मक छ ।’
उता संघर्ष समितिको तर्फबाट वार्तामा सहभागी युवराज राईले पनि वार्ता सकारात्मक भएको प्रतिक्रिया दिए । ‘हिजो दुवै पक्षबीच आ–आफ्ना कुरा राखियो । उहाँहरुको तर्फबाट केही विकल्पसहित आउन भन्नुभएको छ । हामी थप छलफल गरेर आज बिहान बस्छौं,’ उनले भने ।
कोशी प्रदेश सरकारले संघर्षरत पहिचान पक्षधर समूहसँग वार्ता गर्न भौतिक पूर्वाधार विकास मन्त्री जबेगू संयोजक तथा पर्यटन, वन तथा वातावरण मन्त्री गणेशप्रसाद उप्रेती सदस्य र आन्तरिक मामिला तथा कानुन मन्त्रालयका सचिव लक्ष्मीप्रसाद पौडेल सदस्य सचिव रहने गरी वार्ता समिति बनाएको थियो ।
उता, संघर्ष समितिको तर्फबाट भने डकेन्द्र सिंह थेगिम, गोविन्दबहादुर आङबुहाङ, युवराज राई, दिवस राई, लाक्पा शेर्पा, कुमार लिङ्देन मिराक, पदम लिम्बू, अर्जुन जमेली राई, जेन्टल लावती, पदम जबेगू र चन्द्रकुमार चौधरी रहेका थिए ।कोशी प्रदेशसभाले २०७९ फागुन १७ गते प्रदेशको नाम ‘कोशी’ राखेपछि त्यसको विरुद्धमा पहिचानवादीहरु आन्दोलनरत छन् । उनीहरुले पहिचानसहित पुनः नामकरण गरिनुपर्ने माग गर्दै आएका छन् ।