बिर्तामोड, फागुन ३ ।सामाजिक संघ संस्थामा बसेर त्यसको नेतृत्वदायी भूमिका निर्वाह गरेको एउटा अनुभवी व्यावसायिक व्यक्तित्वका रुपमा कृष्ण पौडेल परिचित छन् ।
बिर्तामोडको उद्योग वाणिज्य क्षेत्रमा निरन्तर व्यावसायिक हितको पक्षमा उभिने मध्येका एक हुन् पौडेल । बिर्तामोड उद्योग वाणिज्य संघमा हाल वाणिज्य सचिव रहेका पौडेल आसन्न निर्वाचनमा महासचिवको एउटा दरिलो उम्मेदवारका रुपमा चुनावी मैदानमा छन् ।
स्वतन्त्र व्यावसायिक प्यानलबाट प्रतिस्पर्धामा उत्रिएका पौडेल व्यावसायिक क्षेत्रले नयाँ गन्तव्य तय गर्ने बेला आइसकेको बताउँछन् । बढ्दो वित्तीय संकट र त्यसको प्रत्यक्ष प्रभावका बीच व्यवसायीलाई कसरी राहत दिन सकिन्छ भन्ने विषयमा उनले निरन्तर वकालत गर्दै आएका छन् ।
सामाजिक संघ संस्थाको नेतृत्वमा उनले दुई दशकभन्दा बढी समय बिताइसके । औषधि व्यवसायी संघ झापाको नेतृत्वदायी भूमिकामा उनको तीन कार्यकाल बितिसकेको छ।
त्यसो त धौलागिरी पारिजात बहुउद्देश्यीय सहकारी संस्थाको अध्यक्षका रूपमा उनले १६ वर्ष काम गरे । लायन्स क्लब अफ अनारमनीका संस्थापक अध्यक्ष पौडेल सामाजिक संघसंस्थाको समेत अनुभव बटुलेर संघको गरिमामय महासचिव पदमा आफ्नो दावेदारी प्रस्तुत गरिरहेका छन् ।
जिल्ला सहकारी संघका सञ्चालक समेत रहेका उनी बिर्तामोड उद्योग वाणिज्य संघको वर्तमान नेतृत्वले व्यावसायिक हितका क्षेत्रमा पर्याप्त काम गर्न नसकेको जिकिर गर्छन् ।
व्यवसायीका अनेक पीरमर्का बुझ्न सक्ने नेतृत्व संघमा जानुपर्ने बताउँदै आएका पौडेल संघभित्र अनेक बेथिति बढेको बताउँछन् ।
वित्तीय संकटको यो बदलिदो परिस्थितिमा सबै चुनौतिलाई सामना गरेर जानसक्ने दृढ अठोटका कारण आफूले महासचिवमा उम्मेदवारी दिएको पौडेलले सुनाए ।
‘व्यवसायीका नीतिगत समस्या बुझेर समाधानका लागि पहलकदमी लिन सक्ने सामथ्र्य मसँग छ’, महासचिवका दावेदार पौडेलले सुनाए ।
अर्को महत्वपूर्ण पाटोका रूपमा उनले स्थानीय सरकारसँगको समन्वयलाई बुझेका छन् । स्थानीय सरकारसँग सहकार्य गर्न सके व्यावसायिक क्षेत्रका आधाभन्दा बढी समस्या समाधान हुने महासचिवका उम्मेदवार पौडेलको दाबी छ।
व्यवसायीका मुद्दामा निरन्तर बहस र पैरवी गर्न सक्ने हो भने बिर्तामोडका धेरै व्यवसायीले थिचोमिचो सहनु नपर्ने पौडेलले बताए । उनले भने, ‘व्यवसायीको पक्षमा सबै किसिमका जोखिम मोल्न तयार छु।’
पौडेलको नेतृत्वमा बिर्तामोडमा अहिले नागरिक अस्पतालको निर्माण कार्य पनि अगाडि बढिरहेको छ ।
